Wilson Muuga

Flutningur

2010-09-29T18:22:00.002Z

Ég mun blogga frá Indlandi næstu mánuðina, slóðin er þessi.

Kýr eru heilagar

2010-09-19T18:08:00.003Z

Það var þann 11. september 2010 að ég kom til Udaipur í fyrsta sinn. Frá flugvellinum er hálftíma akstur á hraðbrautinni að borginni. Kýr voru áberandi í vegarköntunum og á veginum, stöku asnar á stangli. Kýr eru róleg dýr en hingað til hef ég talið það afleiðingu af umhverfi þeirra öðru fremur, hef séð þær vappa kæruleysislega úti á túnum á sólríkum dögum í friði frá öngþveiti þéttbýlisins. Hér hefur þessum rólyndu skepnum verið plantað niður í miðju tryllingsins... en bílflautur, nauðhemlanir og handbremsubeygjur fá þeim ekki haggað.

Ég var farþegi í bíl hjá einum þessara trylltu bílstjóra á leið af flugvellinum, sem ók eins og ljón með aðra hönd á stýri, hamraði flautuna og skaut sér milli bíla og akreina eins og norski keppandinn í risasvigi á Ólympíuleikunum. Þegar honum hafði tekist að stinga þá af alla saman og virtist kominn einn á auðan sjó, rak ég augun í kú á miðjum veginum sem kom gangandi í hægðum sínum á móti bílnum. Bílstjórinn hóf strax að þenja flautuna í viðvörunarskyni en kýrin lét hávaðann sem vind um eyru þjóta og henni var þar að auki svo drööööllusama þótt hann nálgaðist á 150 km hraða, tuggði bara sín strá áfram kæruleysisleg á svip. Af langri reynslu vissi hún að hann mundi víkja fyrr eða síðar og það reyndist rétt. Hefði hún haft axlir, hefði hún yppt þeim og hefði hún getað talað hefði hún líklega sagt: „Hvor er heilagari, ég eða þú?“ til að sína hver réði – en hún þurfti hvorugt... svipurinn og festan voru ein og sér nóg til þess að bílstjórinn neyddist til að víkja frá hennar persónulega svæði, sem hún hafði markað sér í tveggja metra radíus í kringum sig á miðri hraðbrautinni.

Kvöldið áður sá ég íslensku myndina Veðramót á kvikmyndahátíð í Nýju Delí. Hátíðin var á vegum íslenska sendiráðsins og fyrir tilviljun fékk ég boð á hana. Myndin átti að hefjast kl. 18:30 þannig að ég vippaði mér inn í þríhjólasmábíl (e. Autorickshaw) hálftíma áður og reiknaði með að það nægði til að komast á staðinn í tæka tíð. Bílstjórinn leit á heimilisfangið á miðanum og kinkaði kolli og við sömdum um verð fyrirfram. Hann reyndist þó ekki þekkja heimilsfangið á miðanum betur en svo að fimm sinnum (ég er ekki einu sinni að færa í stílinn!) á leiðinni stoppaði hann, stökk út á götu og spurði til vegar. Hann fékk misnákvæmar leiðbeiningar og skildi þær misvel líka sýndist mér. Eftir allt hringsólið og vitleysuna stoppaði hann loks, því við vorum komnir á áfangastað. Húsið leit út eins og menningarmiðstöð svo ég borgaði honum fyrir aksturinn og ætlaði inn. Sá á litlu skilti við hliðið að í þessu húsi var þýskt verslunarráð til húsa og vörður við dyrnar gat staðfest við mig að þetta væri EKKI staðurinn. Í þann mund kom hópur ungs fólks þaðan út og bauðst til að aðstoða mig þar sem ég hélt á borgarkortinu og benti á menningarmiðstöðina sem hýsti kvikmyndahátíðina. Þau sögðu mér að það væri fimm km í burtu...(vel gert, herra bílstjóri!). Ein stelpan í hópnum bauðst til að skutla mér um einn km áleiðis á mótorhjólinu sínu, á aðalgötu þaðan sem auðvelt væri að taka strætó eða leigubíl á staðinn. Ég þáði gott boð, enda var myndin byrjuð á þessum tímapunkti...

Umferðin í Delí er gjörsamlega sturluð, til að orða það bara hreint út. Hún er líka full af ökutækjum sem aldrei kæmust í gegnum bifreiðaskoðun heima á Íslandi, hliðarspeglana vantar til dæmis á marga bíla, þeir hafa verið væntanlega verið klesstir af og eigendurnir sjá sér ekki hag í að láta setja upp nýja. Menn nota flauturnar þeim mun meira til að láta vita af sér, ótrúlegt en satt sá ég engan árekstur en margoft munaði hársbreidd.

...þegar við komum inn á aðalgötuna spurði stelpan til vegar og nefndi staðinn sem ég vildi fara á, bauðst til að skutla mér dálítið lengra og ég hugsaði að það gæti varla sakað. Nú vorum við hins vegar kominn inn í umferðina fyrir alvöru... ég hjálmlaus aftan á mótorhjóli hjá bláókunngri indverskri stelpu með flautandi bíla allt í kring, svínandi hvern fyrir annan í kringum hringtorg og yfir gatnamót. Stelpan var a.m.k. 20 kg. léttari en ég og því átti hún í vissum vandræðum með hjólið í beygjum, ég neita því ekki að adrenalínflæðið var töluvert við þessar aðstæður. Lögreglumenn eru áberandi við götur Delí og ég óskaði þess að ég væri með huliðshjálm svo þeir sæu mig ekki (eða bara venjulegan hjálm, því þeir eru til í raunveruleikanum... kannski einfaldara), en einn þeirra stoppaði okkur og spurði: „Hvar er hjálmurinn, félagi!?“ Stelpan útskýrði fyrir honum hvernig í pottinn væri búið og hann reyndist þá geta vísað veginn áfram að staðnum. Eftir 15-20 mínútutna rúnt á mótorhjólinu vorum við næstum því komin á staðinn, þar var bygging með svipuðu nafni og sú sem leitað var að. Hliðverðirnir þar voru samt ekki alveg vissir hvar rétta byggingin væri en í þann mund kom kona að hliðinu sem vildi vita hvað væri um að vera. Hún vissi upp á hár um bygginguna og bauð mér far síðasta spölinn, sem ég þáði með þökkum. Var talsvert rólegri í bílnum en aftan á mótorhjólinu skömmu áður - öryggistilfinning. Konan spurði hvað ég væri að gera í Indlandi o.þ.h. og sleppti mér síðan út á réttum stað. Hún kvaddi og sagði hlýlega að lokum „Velkominn til Indlands. Njóttu tímans hér!“

Ég hafði enn mjög öran hjartslátt þegar ég settist niður í bíósalnum. Var hissa að sjá að þarna voru um 50 manns, allt Indverjar að því er virtist. Um hálftími var liðinn af myndinni, sem ég átti erfitt með að einbeita mér að fyrst um sinn, var hugsað til mótórhjólaferðarinnar og þess sem hefði getað gerst. Hefðum við lent í árekstri , hefði ég væntanlega drepist samstundis en hún getað sloppið betur vegna hjálmsins en þá haft sektarkennd það sem eftir lifði ævinnar. Aðrar hugsanir í þessum dúr leituðu á mig áður en mér tókst að beina athyglinni að myndinni.

Veðramót fjallar um þann viðbjóð sem átti sér stað á svokölluðum upptökuheimilum á borð við Breiðavík hér á árum áður. Niðurdrepandi er rétta orðið um þessa mynd og ég velti fyrir mér hvað Indverjunum finndist. Þrír þeirra gengu út þegar eitt ógeðslegasta atriðið birtist á tjaldinu. Eflaust fóru þeir heim og skelltu góðri Bollývúddmynd í tækið með söngi, tralli og litríkum klæðum - til þess að reyna að jafna sig á þessum íslenska sora.

Ég trúi varla að ég hafi hætt lífi mínu til að sjá þessa mynd.

VINSAMLEGA BÍÐIÐ HÉR EFTIR KALLI GJALDKERA

2010-06-18T01:05:00.004Z

Þetta stóð á skiltum í bankanum. Stundum fór ég þangað í fylgd með foreldrunum. Ég spurði þau hvers vegna gjaldkerakarlinn léti aldrei sjá sig þótt maður biði og biði, enda voru stafsetningarreglur algjörlega á reiki í mínum huga. Þau reyndu að útskýra fyrir mér að þetta þýddi að gjaldkerinn kallaði á næsta viðskiptavin þegar röðin væri komin að honum. Ég trúði því rétt mátulega, hélt að þau væru bara að bulla, enda lifðu þau í öðrum veruleika en ég. Þau lifðu í einhverjum bullheimi þar sem maður þarf að sinna erindum í bönkum og á pósthúsum, fara í búðir og meira að segja að mæta í vinnu. Sjálfur þurfti ég aldrei að hafa áhyggjur af slíku. Ég pældi í töluvert eðlilegri hlutum á þeim tíma.

Þegar ég var einu sinni sem oftar orðinn hundleiður á að standa við biðskiltið færði ég mig að kubbaborðinu. Kannski gæti ég kubbað eitthvað fallegt á meðan foreldrarnir biðu í röðinni eða töluðu við gjaldkerann. Það reyndist vera tímasóun, því einhver annar krakki sat við borðið og hafði tekið alla bestu legókubbana til þess að byggja (að mínu mati) aumkunarverðan skúlptúr. Vonbrigðin uppmáluð stillti ég mér þá aftur upp við biðskiltið og beið.

Ég hafði líka tekið eftir að fullorðna fólkið ræddi oft flókna hluti og notaði hugtök sem höfðu enga merkingu fyrir mér. Það ræddi til dæmis stjórnmál, fjármál og eitthvað úr fréttunum – kannski um forræðisdeilu Sophiu Hansen og Halim Al. Stundum apaði ég eftir hugtakanotkun fullorðna fólksins án þess að hafa hugmynd um hvað ég væri að segja, svona til þess að hljóma virðulegri. Býflugnaveiðar, brunnklukkuveiðar og torfærur á reiðhjóli voru annars mínar ær og kýr.

Að hugsa sér að nú, ”örfáum” árum síðar sé ég orðinn fullorðinn - orðinn einn af bullurokkunum og farinn að taka þátt í vitleysunni. Þvaðra jafnvel um stjórnmál endrum og eins, á meira að segja að heita stjórnmálafræðingur skv. pappírnum. Hvað skyldi ég hafa sagt við því 6-7 ára gamall, hefði ég séð það fyrir?

HM í fótbolta - spá

2010-06-11T07:27:00.004Z

Þar sem spá mín um síðasta EM gekk glettilega vel eftir birti ég hér sundurliðaða spá um úrslit HM:

A-riðill:

1. Mexíkó

2. Úrúgvæ

3. Frakkland

4. S-Afríka

B-riðill:

1. Argentína

2. S-Kórea

3. Nígería

4. Grikkland

C-riðill:

1. BNA

2. England

3. Alsír

4. Slóvenía

D-riðill:

1. Serbía

2. Gana

3. Þýskaland

4. Ástralía

E-riðill:

1. Holland

2. Danmörk

3. Japan

4. Kamerún

F-riðill:

1. Ítalía

2. Slóvakía

3. Paragvæ

4. Nýja-Sjáland

G-riðill:

1. Brasilía

2. Fílabeinsströndin

3. Portúgal

4. N-Kórea

H-riðill:

1. Spánn

2. Chile

3. Hondúras

4. Sviss

16 liða úrslit:

Mexíkó - S-Kórea

BNA - Gana

Holland - Slóvakía

Brasilía - Chile

Argentína - Úrúgvæ

Serbía - England

Ítalía - Danmörk

Spánn - Fílabeinsströndin

Átta liða úrslit:

Mexíkó - BNA

Holland - Brasilía

Argentína - England

Spánn - Danmörk

Undanúrslit:

Mexíkó - Holland

Argentína - Spánn

ÚRSLIT:

Holland - Spánn

Markakóngur: Lionel Messi (Argentína)

Maður mótsins: Wesley Sneijder (Holland)

Hollendingar verða heimsmeistarar, það er á hreinu.

Enska

2010-05-20T22:15:00.003Z

Oftast þegar ég tala ensku líður mér eins og ég sé að reyna að vera "kúl." Ég þarf mjög reglulega að minna sjálfan mig á að ég tala ensku vegna þess að útlendingarnir skilja ekki íslensku.

Líf sem lóa

2010-04-17T09:00:00.006Z

Ég:

Ég þarf að skila skýrslu fyrir hádegi á þriðjudag. Á eftir að lesa 300 blaðsíður og vinna úr þeim. Mæti á fund núna klukkan tíu. Á pantaðan tannlæknatíma klukkan hálfþrjú. Viðtalið frestaðist til hálffjögur svo það ætti að nást líka. Ef mér tekst að rumpa því af á góðum tíma, gæti ég líka náð á æfingu fyrir mat. Ég kíki á fésbókina og gái að tölvupósti. Það virðist allt vera orðið vitlaust heima, hvert eldgosið rekur annað og fréttir af því drekkja fréttunum af þessari skýrslu sem beðið var eftir. Það rignir eldi og brennisteini segja þeir... Var að fá tölvupóst, neyðist til að breyta áætluninni eitthvað... Ég var líka búinn að lofa að hringja í Jens í dag. Nei, nú hringi ég í Jens!

Ég fer með nokkrum félögum í veiðiferð út á land, losna burt frá öllu áreitinu í örfáa daga. Veðrið er milt, það er léttskýjað, hægur andvari og sólin skín. Ég sest í grasþykknið á árbakkanum með stöngina, kasta út og hlusta á vatnsniðinn og kyrrðina. Lóa kemur fljúgandi og lendir í námunda við mig. ”B'dúaaa!B'dúaaa!B'dúaaa!” segir hún, gengur nokkur skref, stöðvar og segir aftur ”B'dúaaa!...” Hún endurtekur þessa rútínu í sífellu. ”Furðuleg hegðun” hugsa ég. Hvað skyldi þetta þýða? Hlýtur að vera eitthvað mikilvægt fyrst hún imprar svona á þessu, dag eftir dag, alla ævi. Kannski er hún bara að tjá gleði sína yfir einföldu lífi sínu, sem snýst einkum um að fljúga um heiðloftin blá með útsýni til allra átta, leita ætis og viðhalda stofninum. Líf hennar virðist ótrúlega einfalt í samanburði við mitt. Hegðunin er kannski ekki svo furðuleg þegar ég hugsa betur um það.

Ég rís á fætur upp úr grasþykkninu, fleygi frá mér veiðistönginni og flýg af stað. Ég flýg hátt í loft upp og sé yfir allt. Eldgosið sést mjög vel úr þessari hæð. Ég flýg nær gosinu til þess að virða það fyrir mér, en passa mig að sveigja fram hjá öskunni og flúorögnunum, ég læt slík smáatriði ekki stoppa mig eins og flugvélarnar. Svo held ég fluginu áfram, skoða fjöllin, vötnin og jöklana. Ég ákveð að lenda við á norður í Laxárdal, skammt frá nokkrum veiðimönnum sem freista þess að fanga lax. ”B'dúaaa!” segi ég og labba smá spöl áður en ég endurtek ”B'dúaaa!” Þeir hafa tekið eftir mér og einn spyr hina: ”Hvað er að honum?” - annar svarar: ”Æ, hann missti vitið, heldur að hann sé lóa!” ”Hahaha! En hvernig gat hann flogið?” - ”Veit það ekki alveg, hann virðist hafa fundið út úr því um svipað leyti og vitið fór.”

Aftur hef ég mig á loft, nú til þess að fara út í heim. Það er þægilegt að vera laus við alla skriffinskuna; vegabréfavesen, bólusetningar og stopular flugsamgöngur. Ýmsar fuglategundir hafa tekið eftir þessum undarlega aðskotahlut í háloftunum, sumir hafa þó áttað sig á hagnýtu gildi hans og fylgja mér eftir í oddaflugi austur á bóginn. Ég klýf loftið betur en nokkur fugl og er því heppilegur til að leiða oddaflug. Við fljúgum yfir Everestfjall, Kínamúrinn og pýramídana. Ég lendi á mörgum áhugaverðum stöðum til þess að kynna mér aðstæður og skoða mig um.

Margs vísari eftir viðburðaríka ferð lendi ég aftur á árbakkanum, hættur að leika lóu.

Lóan:

Ég skil ekki þessa menn, þeir flækja líf sitt svo mikið. Þeir aka um á bílum, borga skatta, fara í detox-meðferðir, hlaupa á hlaupabretti og hvað veit ég! Svo koma þeir hingað í sveitakyrrðina í leit að ró, þegar áreitið er of mikið. Ég er ánægð með að lifa einföldu lífi, það er fínt að fljúga bara um og njóta frelsisins.

Nú þykknar upp, fárviðri mun skella á fyrr en varir. Lóan leitar skjóls í helli.

Hún stendur í hellismunnanum og starir út í storminn, bíður eftir að hann gangi yfir. Þetta ætlar að taka tímann sinn. ”Kannski lifi ég of einföldu lífi...” hugsar hún. ”...Nú væri fínt að hafa það kósý og kíkja á góða bíómynd, spila póker með félögum eða ráfa á netinu. Meira að segja að fara til tannlæknis! Bara eitthvað annað en þetta!”

----

Í netráfi mínu (og sem afsökun fyrir að fresta lærdómnum aðeins) var ég skyndilega farinn að hlusta á fuglahljóð, komst að því að sjósvala gæti slegið rækilega í gegn sem plötusnúður og "rímixari."

Yndislegt fjárhættuspil

2010-02-23T16:14:00.007Z

Fréttir af lottóvinningshöfum eru oft dásamlega fallegar og ylja manni um hjartarætur á þessum síðustu og verstu tímum. Einstæðar mæður sem hafa unnið baki brotnu nótt sem nýtan dag árum, jafnvel áratugum saman, til að sjá börnum sínum fimm farborða, detta oftar en ekki í lukkupottinn í lottóinu. Ný frétt á vef Íslenskrar getspár um vinningshafa helgarinnar er eftirfarandi:

Vinningshafarnir í Lottóinu síðasta laugardag skiluðu sér allir í gær til Íslenskrar getspár með vinningsmiðana. Fyrsti vinningshafinn keypti miðann í Olís við Sundagarða og notaði reyndar vinning frá helginni á undan til að greiða fyrir miðann en þá hafði hann fengið 3 réttar tölur. Þetta var ungur fjölskyldufaðir sem á tvö lítil börn og býr fjölskyldan í 2ja herbergja íbúð í höfuðborginni og voru þau farin að leita sér að stærra húsnæði.

Þessi flotti vinningur léttir þeim því aldeilis lífið og auðveldar þeim að stækka við sig. Næst komu hjón utan að landi sem eiga fjögur börn en þau keyptu miðann sinn í Hagkaup Skeifunni. Hjónin hafa alltaf náð að standa í skilum en bæði þurft að vera í fleiri en einni vinnu til að ná endum saman. Þau hafa verið í mikilli fjárhagslegri endurskipulagningu á undanförnu ári og hafa verið að greiða niður lán og yfirdrátt. Vinningurinn kom þeim því skemmtilega á óvart og þau voru mjög ánægð að fleiri en þau skyldu njóta þessa stóra Lottóvinnings. Þau ætla að geyma vinningsupphæðina og nota sem varasjóð. Fjölskyldan ætlar þó að leyfa sér að fara til útlanda í sumar en það hafa þau ekki leyft sér í mörg ár. Þriðji vinningshafinn var eldri maður sem keypti miðann sinn í Skalla við Vesturlandsveg á laugardaginn en hann ætlaði að láta þrífa bílinn í þvottastöð þar nálægt en vegna þess hversu löng röðin var þá ákvað hann að skella sér í Skalla og kaupa sér samloku og keypti einn Lottómiða með í leiðinni. Það var svo sannarlega ferð til fjár því á miðann vann hann 10,8 milljónir sem kemur sér mjög vel því hann hefur lent í miklum greiðsluerfiðleikum eftir að kreppan skall á. Fjórðu vinningshafarnir komu svo í lok dagsins en það eru hjón af suðurlandi sem eiga tvö börn. Hjónin trúðu því varla þau hefðu unnið stóran vinning í Lottó og kemur vinningurinn sér afar vel fyrir þau líkt og aðra vinningshafa helgarinnar. Íslensk getspá óskar öllum vinningshöfunum til hamingju en enn hefur heppinn miðaeigandi sem var með fjórar réttar tölur og bónustöluna í Víkingalottóinu þann 10. febrúar með vinning að upphæð 4.150.160 kr ekki gefið sig fram. Sá miði var seldur í Ríkinu Snorrabraut í Reykjavík.

Ég feitletraði yndislegustu atriðin. Lottó hefur þróað sérstakt kerfi sem tryggir að enginn "óæskilegur" detti í lukkupottinn, aðeins þeir sem þurfa mest á vinningum að halda og eru krúttlegastir. Vinningslíkur fyrirfram á hverja röð eru ekki þær sömu, heldur ráðast þær af svokölluðum krúttleikastuðli viðkomandi - þeim mun hærri krúttleikastuðull, þeim mun meiri líkur á vinningi.

Gefum okkur samt að vinningshafinn úr Víkingalottóinu sem ekki hefur gefið sig fram sé Jón Ásgeir eða Davíð Oddsson. Gætu fréttaritarar fjárhættuspilsins kokkað upp fallega og hjartnæma sögu um "mann sem hefði þurft að berjast gegn straumnum undanfarið," "lent illa í kreppunni" o.s.frv.? Kannski væri einfaldara í slíku tilviki að segja vinningshafann óska nafnleyndar, þar sem krúttleikastuðull þessara manna er umdeildur.

Ég spyr, þú svarar.

Stóra klósettmálinu loksins lokið

2009-10-12T08:40:00.004Z

Stutt upprifjun úr síðasta þætti: Guðmundur flutti inn í námsmannaíbúðina og sá að klósettið var slíkur viðbjóður að annað eins hafði hann ekki séð. (Við sjáum ekki myndir). Hann fór og kvartaði til þar til gerðra yfirvalda og yfirvaldið kom og skipti um klósettsetu, eins og það væri nóg!

Næsti þáttur:
Öðru sinni fór Guðmundur og kvartaði, fyrst við húsvörðinn og síðan við Húsnæðisskrifstofu alþjóðanema. Húsvörðurinn stóð fast á þeirri skoðun sinni að botninn á klósettinu væri bara skítugur, ekki slitinn, eins og G. hélt fram. Hann benti G. jafnframt á að kvarta við Húsnæðisskrifstofuna undan ófullnægjandi þrifum klósetts. Húsvörðurinn var þó reiðubúinn að gera við sturtun klósettsins, sem hafði virkað illa til að byrja með og var hætt að virka á þessum tímapunkti. Vatnsfötu þurfti til að sturta nú orðið.

Næsta stopp, Húsnæðisskrifstofan: G. var ekki of bjartsýnn fyrir ferð sína á Húsnæðisskrifstofuna, enda hafði hann í fyrri heimsókn sinni þangað fengið nokkur svör í stíl við "Computer says no!" Í þetta skiptið talaði hann við annan þjónustufulltrúa og byrjaði á að nefna að ekkert svar hefði fengist við tölvupósti til hins þjónustufulltrúans, sendum fyrir fimm virkum dögum. Svo sagði hann alla sólarsöguna af klósettinu og fleiri vanköntum á íbúðinni sem ekki verða tíundaðir frekar. Í stuttu máli sagt voru svör þessa þjónustufulltrúa mun ásættanlegri en þess fyrri og lofaði hann m.a. að senda Þrifameistara Húsnæðisskrifstofunnar á svæðið, sem hann nefndi einhverra hluta vegna að væri indverskur. G. áttaði sig ekki alveg á hvernig það kom málinu við, en hvað um það...

Í morgun mætti Þrifameistarinn á svæðið, vopnaður allra handa hreinsibúnaði og hófst handa. Hann sagði að klósettið væri verra en hann hefði búist við og sótti "extreme case" - græjur út í bíl. Síðan heyrði G. alls kyns skraphljóð innan af klósetti og púst og fáein blótsyrði. Þetta stóð yfir í um 40 mín., en þá kom maðurinn brosandi út og sagði verkinu lokið. G. leit á og gat staðfest það, hann hafði ekki látið nægja að þrífa klósettið heldur tók allt baðherbergið í gegn. Ekki var laust við ofbirtu í augun þegar litið var á dýrðina, ekki ósvipað Mr. Proper auglýsingu. Eru þá ekki allir sáttir? Stóra klósettmálinu er hér með lokið á farsælan hátt.

Látum hressan þjónustufulltrúa um að enda þetta:

Bara venjulegur fimmtudagsmorgun

2009-10-03T14:31:00.006Z

Á fimmtudagsmorguninn lagaði ég morgunkaffið og kíkti aðeins í tölvuna. Ég átti eftir að klæða mig þegar einhver sauðslegur maður óð inn í íbúðina. Hann hafði ekki fyrir því að banka á undan, opnaði bara með lykli og lét eins og heima hjá sér. Hann hélt á kassa. Þegar hann sá að ég var heima sagði hann einhverja óskiljanlega þvælu á dönsku. Ég bað hann vinsamlegast að bera upp erindið á ensku og þá sagðist hann á blöndu af ensku og dönsku vera kominn til þess að skipta um klósettsetu hjá mér og að sér hefði verið sagt að ég væri ekki heima (hver átti svosum að vita það?), þess vegna óð hann bara inn.

Fyrr í vikunni hafði ég kvartað undan klósettinu í íbúðinni og beðið um að því yrði hreinlega skipt út, þar sem það er virkilega sjúskað og ógeðslegt. Veit ekki hversu mikið ég á að fara út í smáatriði, en það er sem sagt mjög slitið neðst og lítur út fyrir að vera óhreint. Ástæðan líklega sú að einhver fyrri íbúi hefur notað tærandi efni til þess að hreinsa klósettið. Klósettsettan var líka öll upplituð (svona skitugul e-n veginn), en nú er vinur okkar búinn að skipta henni út sem sagt, fyrir glæsilega glansandi nýja postulínssetu svo ég geti tekið gleði mína á ný. Þar að auki er vatnskassinn stundum í nokkra klukkutíma að fyllast eftir að sturtað er... Með öðrum orðum, það þarf að skipta þessu klósetti út.

Ég nefndi við manninn að ég hefði viljað fá klósettinu í heild skipt út. Hann sagðist bara hlýða fyrirmælum að ofan og að ég yrði að tala um þetta við húsvörðinn. Ég var búinn að því, en húsvörðurinn hafði komið einn daginn þegar ég var ekki heima að líta á klósettið. Hans niðurstaða hefur greinilega verið sú að eingöngu þyrfti að skipta um setu...Nema að þessu verði öllu skipt út, bara í nokkrum skömmtum, næst kemur maðurinn kannski að skipta út skrúfum eða eitthvað.

Panikk

2009-09-04T09:06:00.003Z

Verd ad vidurkenna ad eg fekk halfgert "panic attack" thegar eg skradi mig inn a facebook i dag eftir ad hafa stofnad reikninginn i gaerkvoldi. A skjanum birtust alls kyns samtol og nofn og myndir af folki sem eg thekki og sem eg thekki ekki og eitthvad sem thad hafdi skrifad, eins og einhvers konar pop-up. Byst vid ad thetta se hefdbundid og ekkert nytt fyrir flestum, enda flestir a minum aldri longu komnir med slikt apparat.

Svo var nett panikk thegar eg opnadi hotmail og atti milljon olesin skeyti tengd f.b. Leid eflaust svipad og Bruce Almighty i samnefndri mynd thegar hann fekk ad vera gud um tima og oskadi eftir ad fa baenir alls folks i heiminum sendar i tolvuposti....

...Jaeja, eg er adeins ad ykja.

Danmörk - fyrstu dagarnir

2009-09-03T19:02:00.004Z

Eins og flestir sem þekkja mig vita, er ég fluttur til Danmerkur. Byrjaður í námi í Álaborgarháskóla, sem lítur mjög vel út. Kominn með íbúð á leigu, en netið er ekki komið í gagnið þar, því miður. Mér leið eins og Palla, sem var einn í heiminum, daginn sem ég fékk íbúðina, var búinn að taka aðeins upp úr töskum og svona og ætlaði að kíkja á netið - hviss bamm búmm! ekkert net, aleinn í útlöndum í ókunnu húsi.

En dagarnir á eftir hafa verið mjög fínir. "Allra þjóða kvikindi" eru með mér í náminu og hef ég náð tali af ýmsum þeirra. Verst er að muna ekki nema brot af nöfnunum, en það kemur vonandi smám saman. Gæti orðið auðveldara en ella þar sem ég var að opna bók kennda við feis. Sendi út nokkrar vinabeiðnir en gafst svo upp í bili. Í dag var fyrsti kennsludagur og í einum tímanum sat ég á milli Bandaríkjamanns og Afgana (milli steins og sleggju?), hef ekki hitt Afgana áður svo ég muni.

Þegar ég hef kynnt mig hafa allir með engri undantekningu hváð og beðið um endurtekningar, jafnvel að ég skrifaði nafnið fyrir þau eða stafaði. Ánægjulegt að hafa svona international nafn. Ég hef ákveðið að segja nafnið eins og það er gert á íslensku. Vil ekki segjast heita Gummi eða eitthvað, sérstaklega ekki við Danina, gummi þýðir jú smokkur á dönsku.

En ég nenni ekki að skrifa meira í bili. Of margt sem ég ætlaði að skrifa og ég get ekki ákveðið hvað á að nefna og hvað ekki, þannig að við segjum það að sinni.

Þjónusta!

2009-08-10T21:28:00.004Z

Í vegasjoppu við Þjóðveg eitt:
Ég: Góðann daginn, tvær með öllu.
Afgreiðslustúlka: Viltu líka kokteilsósu á þær?
Ég: Nei, takk.
Fyrsta verk afgreiðslustúlku er að setja steiktan, hráan og kokteilsósu í pylsubrauð. Ég fylgist undrandi með. Og svo:
Afg.: Hvort sagðirðu aftur nei takk eða já takk við kokteilsósunni?
Ég: Ég sagði nei takk!
Afg: Ó.
Byrjar upp á nýtt og man í þetta skiptið að sleppa kokteilsósunni.

Annars er kokteilsósa ágæt, sérstaklega með frönskum, síður á pylsur.

Lærdómur: Verum ekki á sjálfstýringu og "cruise control" í vinnunni.

Af kvöldmat

2009-08-03T12:57:00.005Z

Var einn heima í gærkvöldi um kvöldmatarleytið. Opnaði kæliskápinn og við blasti ólgandi beinhreinsað laxastykki. Skipti engum togum að ég þrumaði nýjum kartöflum í pott, galdraði fram sósu úr súrmjólk, grískri jógúrt, ferskum basil, tarragoni og smá dilli. Setti síðan sítrónupipar, pipar og Himalaya salt á laxastykkið og steikti á pönnu ásamt sveppum (hljómar kannski frekar steikt, en átti vel við með laxinum). Á sumrin gefst miklu betri tími til tilraunaeldamennsku en á veturna.

Þetta féll eins og flis í munn og steinlá og hvað það nú heitir allt saman. Þetta var skammtur fyrir tvo og vantaði kvenmann til að borða með. Það er líka djöfullegt að vera einn til frásagnar um þetta því þá getur fólk véfengt og dregið í efa.

Yfirleitt finnst mér lélegt þegar menn hrósa sjálfum sér, en ég gat ekki setið á mér núna, slíkur var myndarskapurinn.

Svona gera menn ekki?

Aðalmálið að vera með?

2009-08-03T12:01:00.002Z

Liverpool fengu skell gegn Espanyol í æfingaleik í gær, töpuðu 3 - 0. Í viðtali eftir leikinn segir kantmaðurinn knái, Riera, leikæfinguna mikilvægari en úrslitin.

Svo er bara spurningin hvað Riera segir í lok komandi tímabils ef það verður enn eitt tímabilið án Englandsmeistaratitils - kannski "Aðalmálið er að vera með," áhangendum til ómældrar gleði.

Svona gera menn ekki.

Jón drekkur Bónus-pilsnerinn beint úr dósinni. Hvað gerir þú?

2009-07-11T05:36:00.006Z

Krónan selur mikið af vörum undir merkjum First Price, framleiðanda sem reynir að selja ódýrari vörur, svipað og Euroshopper. First Price brydda hins vegar upp á þeirri skemmtilegu nýbreytni að láta fólk sitja fyrir á myndum sem prýða umbúðirnar. Hér eru nokkur dæmi:

Dæmi hver fyrir sig hversu kjánalegt þetta er. Fólkið á myndunum fékk fyrirmælin "Sýndu hvernig varan er notuð, horfðu í myndavélina og brostu út fyrir."

Svokallaðir útrásarvíkingar Íslands hafa beðið álitshnekki meðal almennings. Þá vantar leið til þess að byggja upp ferilinn á ný, endurreisa orðstír sinn og stolt. Fyrsta skrefið gæti verið að sitja fyrir á matvöruumbúðum. Þessar myndir koma strax upp í hugann:

Hannes Smárason að raka sig.
Jón Ásgeir að drekka Bónus - pilsner.
Sigurjón Árnason að borða hnetusmjör.
Bjarni Ármanns að útbúa eggjaköku.

Hvert mannsbarn mundi þekkja þessi andlit og hugsa til þeirra með hlýhug í eldhúsinu, á baðherberginu, í garðinum, jafnvel í forstofunni. Þetta gæti orðið upphafið að nýjum og glæsilegum ferli útrásarvíkinganna.

Robert Mugabe byrjaði sem fyrirsæta á sjampóbrúsa, sjáið hvar hann er í dag.

Er enginn að afgreiða hérna?!

2009-07-05T19:34:00.003Z

Fréttablaðið birti þessa mynd með frétt á föstudaginn. Fréttin var um þátt á sjónvarpsstöð Ingva, ÍNN, sem búið er að leggja af eða leggja í bleyti eða eitthvað. Fljótt á litið virðist myndin ekki koma fréttinni við að öðru leyti en því að þetta er Ingvi...með tómt vínglas í hönd. Niðurstaðan á kaffistofunni í vinnunni var sú að Ingvi væri að senda lesendum fréttarinnar skilaboðin "Er enginn að afgreiða hérna?! Glasið mitt er tómt!" eins og glögglega má sjá á svipnum.

Aukahlutirnir sem skapa sterkan karakter

2009-06-28T09:07:00.006Z

Í vikunni sem leið skoðaði ég gleraugnaumgjarðir í tveimur gleraugnabúðum, með umgjarðarkaup í huga. Í þeirri fyrri var ég spurður hvort ég hefði eitthvað ákveðið í huga. Ég neitaði og fékk þá að sjá fullt af umgjörðum, með ólíkum eiginleikum og útliti. Sumar umgjarðanna sagði sölumaðurinn að hefðu mjög sterkan karakter. Misjafnt var hve sveigjanlegar umgjarðirnar voru, hann sýndi mér t.d. tvennar umgjarðir frá sama framleiðanda sem voru úr sama efni og líkar í útliti, en á öðrum þeirra mátti sveigja armana upp og niður og borga rúmar 10 þúsund aukalega fyrir það. Ekki tókst að sannfæra mig um nauðsyn þessa möguleika.

Í seinni gleraugnabúðinni voru mér líka sýndar umgjarðir með ólíkum sveigjanleika, en þar virtist karakter umgjarðanna vera það sem helst greindi þær hverja frá annarri. Meira áberandi umgjarðir voru umgjarðir með sterkari karakter. Mér leist yfirleitt betur á lítt áberandi umgjarðir. En auðvitað fór ég síðan að velta fyrir mér hversu sterkur karakter ég væri og hvort gleraugnaumgjarðir gætu styrkt karakter minn. Gæti ég ef til vill styrkt karakter minn um fjórðung, bara með því að punga út 30 þúsundum aukalega í umgjarðir með nautsterkum karakter? Þetta krafðist verulegrar umhugsunar og heilabrota, en á endanum var ég nógu sterkur karakter til að fúlsa við gylliboðum um umgjarðir með dúndrandi sterkum karakter og yfirleitt hærra verði eftir því. Menn hafa misjafnan smekk, en ég trúi varla að þeir sem hafa smekk fyrir áberandi umgjörðum líti á þær sem merki um sterkan karakter, en hvað veit maður.

Umtalað er hve sterkur karakter Sævar er. Það skýrist af þremur þáttum:
Gleraugnaumgjarðirnar sem hann notar skýra 50% af karakter hans, jeppinn 30%
og bílalánið 20% (hann fékk sér bílalán með virkilega sterkum karakter sko, svo sagði sölumaðurinn að minnsta kosti).

11 eintök af Bláma

2009-06-25T21:03:00.004Z

Er að hlusta á lýsingu Bjarna Fel á leik Stjörnunnar og Vals, sem Stjarnan er að mala, ekki að spyrja að því. Nema hvað, Bjarni kallar þá alltaf Stjörnustráka. Bjarni er þar að rugla þeim saman við aðalpersónu jóladagatals Sjónvarpsins um árið, Stjörnustrákur, um stjörnustrákinn Bláma.

"En boltinn berst beint til stjörnustráks..." Annars væri tilkomumikið að sjá ellefu eintök af Bláma spila fótboltaleik. Fruntalega kerlingin mundi að sjálfsögðu stýra liðinu.

Spurning dagsins

2009-06-06T11:23:00.000Z

Hver er líkamlegur leiðtogi Tíbeta?

Rökstuddur grunur

2009-05-16T06:12:00.005Z

Þegar ég sá fyrstu þættina af Sigtinu í umsjón Frímanns Gunnarssonar grunaði mig að persónan væri að miklu leyti byggð á Jóni Ársæli af Stöð 2. Sá grunur var ágætlega rökstuddur í Fréttablaðinu í morgun, þar sem Jón segir um Hallbjörn Hjartarson:

"Ég minnist þessa íslenska kúreka baksa til hrossa sinna í norðlenskri stórhríð svo sá ekki út úr augum. Ég sá hann líka velta sér upp úr stofugólfinu heima með köttinn í fanginu þar sem hann táraðist yfir slæmsku heimsins. Þar var ljóðið íslenskt, hreint og tært. Þar var kominn hinn eini sann kúreki norðursins."

Og Jón er ekki hættur:

"Þegar ég horfi til baka man ég að ég vissi ekki hvaðan á mig stóð garrinn þegar Halbjörn mætti eins og fullskapaður til borgarinnar á sínum tíma, alklæddur kúrekadressinu, sveiflandi svipu, hljóðnema og hatti og söng um mann og gresju, snöru og háls og blámann sem býr með okkur öllum."

Alveg rólegur, Jón...:

"Og svo býr Hallbjörn Hjartarson yfir hugsjónum. Hann sér langt, langt út fyrir drullupollinn sem okkur hinum þykir svo vænt um að svamla í. Hann á sér vængi sem lyfta honum hátt yfir jökulklædda tinda upp í forsal vindanna. Harpa hans býr yfir tóni sem aldrei má þagna."

Ég held að Jón eigi við að Hallbjörn sé fínn karl, honum finnst bara betra að orða það svona. Annað eins orðagjálfur hef ég varla séð fyrr eða síðar, kannski ætti ég frekar að orða það svona:

Harpa Jóns býr yfir tóni sem má þagna, í forsal vindanna.

Klikkuð gömul kerling

2009-05-11T11:53:00.004Z

Gamla konan á hæðinni fyrir neðan er stundum nokkuð kostuleg. Hér hafa verið iðnaðarmenn undanfarna daga að endurnýja baðherbergið og þeir hafa þurft að taka vatnið af húsinu nokkrum sinnum af því tilefni. Í fyrrakvöld þegar þeir voru farnir fyrir nokkrum klukkutímum hringdi dyrabjallan og þá var það sú gamla, sem sagði að það sturtaðist ekki niður í klósettinu hjá sér. Ég hringdi þá samstundis í frænda minn (sem er einn iðnaðarmannanna) og lét hann vita, hann sagðist mæta um hæl til að kíkja á þetta. Hann mætti síðan ásamt píparanum og þeir fiffuðu klósettið á hæðinni fyrir neðan. Gamla konan hafði haft uppi ýmis nokkuð kostuleg orð, en best fannst mér samt það sem hún sagði við mig þegar strákarnir voru nýfarnir. Þá benti hún á hausinn á sér, skælbrosti og sagði við mig:

"Þeir halda örugglega að ég sé KLIKKUÐ gömul kerling!"

...með mjög sterkri áherslu á "klikkuð".

Þetta var án efa betra í hennar meðförum en í þessum texta, en ég náði þessu því miður ekki á myndband.

Sami maðurinn?

2009-05-05T08:55:00.007Z

Adam West er borgarstjóri í teiknimyndaþáttunum Family Guy. Ég get ekki að því gert að mér finnst hann minna ískyggilega mikið á Ólaf F., sem var borgarstjóri í Reykjavík fyrir ekki margt löngu. Ég er ekki frá því að persónan West sé byggður á Ólafi. Nokkuð sérstakur svona.

Adam West

Ólafur F.

Meira að segja báðir með rautt bindi. Þessi West verður líka skemmtilegri ef maður sér hann alltaf sem Ólaf.

Saurblöð

2009-04-29T13:41:00.005Z

Þegar skila á ritgerðum í skólum er venjulega krafist saurblaða fremst. Þegar nemendur spyrja til hvers í ósköpunum þurfi sérstakt autt saurblað fremst í ritgerðir, er þeim oftast svarað með vísun til hefða, "Það er nú bara venjan!" Merkilegt er að halda skuli í heimskulegustu hluti eingöngu vegna hefðar. Saurblöð eru ekkert annað en sóun á pappír.

En þótt saurblöð séu heimskuleg á ritgerðum gæti verið við hæfi að hafa þau á kjörseðlum fyrir næstu kosningar, enda skeindi einhver tæpur kjósandi í Reykjavík sér með kjörseðli í kosningunum á laugardaginn, eins og mbl.is greinir frá.

Frískamín!

2009-04-13T10:49:00.002Z

Google hefur vit fyrir fólki

2009-04-07T15:58:00.005Z

Áðan gúgglaði ég orðið "þaulsætnu", vegna þess að ég ætlaði að nota það í ritgerð og vildi vera viss um að ég væri ekkert að rugla með það. Google taldi sig vita betur og spurði hvort ég ætti við "palestínu" eins og meðfylgjandi mynd sýnir:

Auðvitað hefði verið möguleiki að ég hefði velt fyrir mér: "Hvar eru nú aftur stöðug átök og stríð sem sagt er frá í fjölmiðlum? Er það ekki í Þaulsætnu? Best að gúggla það".

Annars er "þaulsætnu" og "palestínu" ekki sérstaklega líkt.

Fréttaefni

2009-02-10T10:48:00.004Z

Í gær var frétt um rifrildi forsetans og forsetafrúarinnar í viðtali við franskt slúðurblað á íslenskum netmiðlum. Ég heyrði með öðru eyra þegar brot af rifrildi forsetafrúarinnar og forsetans úr franska slúðurblaðinu var leiklesið með nokkrum tilþrifum í fréttatíma RÚV.
..."Ólafur: "Dorrit, þú getur ekki sagt þetta!""

Kannski er þetta efni í spænska sápuóperu, en varla í fréttatíma.

Stjórnleysi

2009-01-26T15:20:00.001Z

Nú er landið stjórnlaust, svo sagði Geir. Ég veit varla hvort ég þori út úr húsi.

Mótmælin

2009-01-23T00:23:00.003Z

Ég var viðstaddur mótmælafund á Arnarhóli 1.des. síðastliðinn. Þá voru haldnar nokkrar ræður og klöppuðu viðstaddir fyrir. Það sem var asnalegt þar var að fólkið talaði út og suður, menn lýstu ólíkum skoðunum á því hvað þyrfti að gera og hverja ætti að draga til ábyrgðar. Einhver steig í pontu og lýsti frati á samstarfið við Alþjóðagjaldeyrissjóðinn og sagði landið hafa verið "ofurselt" þeirri stofnun og þess háttar. Viðstaddir fögnuðu þessum orðum með lófataki.

Síðan steig Þorvaldur Gylfason i pontu og lýsti m.a. velþóknun á samstarfi við Alþjóðagjaldeyrissjóðinn og sagði að það hefði átt að hefja miklu fyrr. Aftur fögnuðu viðstaddir með lófataki. Þetta er eitt dæmi af nokkrum þar sem sama fólkið fagnaði andstæðum viðhorfum með lófataki. Afar sérstakt, svo ekki sé meira sagt.

Síðan fór ég í kvöld á Austurvöll, þar var allt annað uppi á teningnum. Trommað var í takt og "vanhæf ríkisstjórn!" kyrjað á milli. Þau mótmæli verða að teljast mun markvissari heldur en mótmælin 1.des. þar sem fólk samsinnti hlutum sem pössuðu ekki saman. Sennilega er rökréttara að mótmæli takmarkist við það sem einhugur er um.

Snilldarlausn!

2009-01-14T22:15:00.005Z

Að láta gamlingja á Grund greiða fyrir Icesave sukkið og annað sukk í sama dúr.

Það var að minnsta kosti það sem manni datt í hug að ætti að gera þegar fram kom í tíufréttum Sjónvarpsins í kvöld að gjald manns fyrir kjallaraherbergi á Grund sem hann þarf að deila með öðrum manni hefði um áramót hækkað um 110% eða úr 99.000 í tæp 210 þús. Svörin sem fengust frá Tryggingastofnun voru að reglur hefðu breyst um áramót þannig að tekið væri að öllu leyti tillit til tekna viðkomandi á liðnu ári, en ekki að hluta til eins og áður. Sjá hér.

Þetta er samt týpísk ákvörðun þar sem engin svör fást nema einhver þvæla og enginn veit hver stendur fyrir, hver vísar á annan.

Látum liggja milli hluta að hækkunin sé hlutfallslega mikil, en 210 þúsund fyrir kjallaraherbergi á Grund sem deilt er með öðrum er algjört kjaftæði, jafnvel þótt einhver þjónusta sé innifalin.

Flugdrekahlauparinn

2009-01-03T01:30:00.003Z

Nú er ég búinn að lesa Flugdrekahlauparann eða The Kite Runner, sem ég byrjaði á seint í sumar og var langt kominn með þegar brjálaða tímabilið hófst í skólanum og hlé var gert á lestri annarra bóka en námsbóka.

Það besta við þessa bók er hversu vel höfundur lýsir öllum aðstæðum og persónum, nánast eins og maður sé á staðnum. Aðalpersónan skilst ótrúlega vel og hvernig sektarkennd úr æsku mótar allt líf hans og gjörðir. Uppgjörið við þessa sektakennd er ótrúlegt og ég man ekki eftir neinu fyrirsjáanlegu í bókinni. Þrisvar sinnum eða svo fékk ég hroll við lestur bókarinnar og ég man tæpast eftir að það hafi gerst áður við lestur bókar, svona þar sem ég trúði varla textanum og þurfti að lesa aftur til að fullvissa mig. "Nei, nú lýgurðu!". En það var engin lygi.

Þessi bók fær sennilega bara fullt hús. 10.

Leikhús

2008-12-28T15:10:00.005Z

Fór í leikhús í gærkvöldi á Sumarljós, sem fjallar um líf í þorpi úti á landi. Þetta er óttalegt rugl en þó er einhver söguþráður. Of mikið er af uppfyllingaratriðum sem gera ekkert fyrir söguna, einnig er mikið af misheppnuðu gríni.

En það var líka slatti af góðu gríni, einkum frá Eggerti Þorleifssyni, sem stal senunni og var óumdeilanlega bestur í sýningunni, sérstaklega sem elliær fyrrum stjórnmálamaður sem virtist vera blanda af Halldóri Ásgrímssyni, Ólafi F, Guðna Ágústssyni og Steingrími Hermannsyni.

Tvær og hálf stjarna af fimm fyrir þetta. Nett klént.

Jólabækurnar

2008-12-23T23:47:00.003Z

Jólabækurnar eru auglýstar grimmt í sjónvarpinu. Auglýsingar eru yfirleitt ætlaðar til þess að segja fólki hvers vegna það eigi að kaupa vöruna. Fólk spyr: "Hvers vegna ætti ég að kaupa þessa vöru?" og auglýsingin svarar því. Í bókaauglýsingum í sjónvarpi er rökstuðningurinn fyrir kaupum gjörsamlega skotheldur.

Svo spyr maður sig...
Hvers vegna ætti ég að kaupa þessa vöru?
Svar: "Ég skal vera grýla. Margrét Þrastardóttir hefur ósjaldan migið í saltan sjó og hún hefur aldrei verið hrædd við að vera grýla" [kjánalegt stef er leikið undir]

...Já, þú skalt vera grýla en ég kaupi ekki bókina.

Losun

2008-12-08T15:52:00.002Z

Fór í fyrsta próf í morgun. Gekk svona sæmilega held ég, en ég var reyndar mjög þreyttur og mátti berjast við að halda mér vakandi á köflum. Of lítill svefn gæti verið ein ástæða. Önnur ástæða gæti verið að ég fékk úthlutað sæti fremst, borðið var beint á móti borði annarrar yfirsetukonunnar, sem er ekki það sem maður hefði valið ef maður hefði fengið að ráða. Nema hvað, ég hef þessa yfirsetukonu grunaða um að hafa nýtt vannýttar losunarheimilidir á meðan á prófi stóð. Að minnsta kosti gossaði tvisvar upp hrikaleg fýla svo lá við eitrun og yfirliði, að ekki sé minnst á truflun á einbeitingu. Losunin var hljóðlaus eins og gefur að skilja, svo þetta var eins glæpsamlegt og hægt var.

Menning og lífsstíll

2008-11-23T11:21:00.003Z

Á Edduverðlaununum um daginn voru veit verðlaun fyrir "Menningar - eða lífsstílsþátt" ársins. Tilnefndir voru bókmenntaþátturinn Kiljan, Káta maskínan (?) og Ítalíuævintýri Jóa Fel. Af þessum þáttum hef ég bara séð eitthvað af þættinum Kiljan. Hvort ætli hann sé menningar - eða lífstílsþáttur?

Er annar eða báðir hinna þáttanna lífstílsþáttur? Jói Fel fer til Ítalíu og eitthvað...það gæti flokkast sem lífsstíll. Lífskúnstnerinn Jói kynnir áhorfendum nýjan lífsstíl.

Hvenær verða veitt verðlaun fyrir menningar- eða lífstílsstrokleður ársins? Þá væru Boxy strokleður án efa tilnefnd, enda stendur á umbúðunum "The basic concept of Boxy always aims at a simple lifestyle"

Eða er orðið "lífsstíll" ofnotað bullorð?

Framandi veitingar

2008-11-10T07:59:00.002Z

Í veislunni var boðið upp á köku með svokölluðu nachos ofan á. Gamalt fólk bragðaði á kökunni og skeggræddi síðan og reyndi að bera kennsl á þetta torkennilega nasl.
Nr.1: "Bíðið nú við, hvað er þetta eiginlega ofan á kökunni? Þetta er ekki kornflex...?"
Nr.2: "Na, jú þetta er svona..."
...
Ég beið eftir að heyra einhvern segja að þetta væri svona kornflex með feiti og torkennilegu kryddi.

Viðtekin sannindi

2008-11-06T14:14:00.004Z

Ýmsu er fleygt fram sem viðteknum staðreyndum þessa dagana.

Verð að taka undir með Má hér. Það eru stórmerkileg tíðindi að "karllæg áhættufíkn" hafi steypt okkur inn í kreppu, en þetta mun víst bara vera raunin. Karlar verða bara að bíta í það súra epli. "Kvenlæga varfærni" hefur skort í viðskiptum.

Nokkrir stjórnmálamenn hafa látið þessi orð falla í tilefni kreppu: "Íslendingar eru fljótir að laga sig að breyttum aðstæðum og hafa alltaf verið"

Það er stórkostleg tíðindi að blökkumaður hafi verið kosinn forseti Bandaríkjanna. Mörgum virðist skítsama hvaða stefnu hann hefur. Mér finnst kolrangt að einblína á það - frekar að líta á að hann hefur betri stefnumál en mótframbóðandinn hafði og virðist einfaldlega klárari, þótt það sé auðvitað matsatriði. Eða hvað? Kannski hef ég rangt fyrir mér. Kannski hefðu það verið stórkostleg tíðindi að blökkumaður skyldi vera kosinn, sama hver hann væri...Dömur mínar og herrar, nýr forseti Bandaríkjanna...

...50 cent. Stórkostleg tíðindi fyrir blökkumenn um allan heim.

Vissulega virðist kosning Obama hafa verið viss sigur í baráttunni gegn kynþáttafordómum, en það er engin ástæða til að einblína á húðlitinn eins og mjög margir virðast gera.

Ofantaldar staðreyndir hljóma fyrir mér álíka gáfulegar og staðreyndin að "Íslendingar eru svo klárir í viðskiptum - þeir kaupa bara heiminn - útrásarvíkingarnir - nú ætla Íslendingar bara að eignast Danmörku ha? Hjálendan eignast herraþjóðina. Rosalega eru Danir öfundsjúkir..." o.s.frv.

Víkverji skrifar...

2008-10-29T15:51:00.003Z

Víkverji fór í sund í gærkvöldi. Heyrði hann á tal pottverja:
Pottverji 1 (yfirgnæfði aðra pottverja): "Svo er það Ögmundur, hann er kommúnisti!"
Pottverjar töluðu síðan allir í einu, uppi varð fótur og fit og menn fóru mikinn og tróðu marvaðann í lausnum í efnahagsmálum.
Pottverji 2 (hátt og snjallt yfir hópinn): "Heyrðu, hvað var hann Hörður Torfa að rífa sig í sjónvarpinu í gær?"
Aftur varð uppi fótur og fit meðal pottverja, sem töluðu hver í kapp við annan og vörpuðu fram fleiri gráupplögðum lausnum á slíkri kreppu.

Lausnin gæti verið sú að skipa pottverja sem seðlabankastjóra og skipta út núverandi ríkisstjórn fyrir ríkisstjórn pottverja. Enn fremur má hugsa sér pottverja í útrás á komandi árum.

Höfðingleg boð

2008-10-17T11:09:00.003Z

Fyrirsögn á bankafrétt hjá mbl.is : "Boðin launalækkun". Þessi orð fara illa saman, hljómar óeðlilega. Hvernig fer þett fram?

"Nú ætla ég að gera þér tilboð sem þú getur ekki hafnað!"
"Ok, lát heyra"
"Launalækkun upp á 20%"
...

"Fuckin' Icelanders"

2008-10-12T23:43:00.007Z

Ég hef vissar áhyggjur af því að ímynd Íslands hafi beðið skipbrot eins og frjálshyggjan upp á síðkastið. Fyrst var æsingur í Bretlandi, síðan Hollandi og vísast er að óhróður Íslands eigi eftir að berast um gjörvalla heimsbyggðina. Börn í Malí gætu verið farin að tala um "Fuckin' Icelanders" áður en langt um líður. En titill færslunnar er reyndar vísun í hollenskan dópmangara í nýju bíómyndinni Reykjavík - Rotterdam, mæli hiklaust með þeirri mynd.

Að þessu sögðu virðist rökrétt að skipta um nafn á landinu. Helst þarf nafnið að vera sem ólíkast núverandi nafni, svo erfitt sé að tengja við það. Tillaga að nýju nafni fyrir Ísland er...

...Zanubia

Það eru tveir augljósir kostir við það nafn, í fyrsta lagi hljómar það eins og nafn á Afríkuríki og mjög erfitt er að tengja það við Ísland. Í öðru lagi er viðeigandi að taka upp nafn sem gæti verið á þróunarlandi vegna þess að hér stefnir allt í að verða rjúkandi rústir og þá þarf að hefja uppbyggingu frá grunni.

Síðan mætti auglýsa verslunarferðir og ódýran bjór, til þess að fiska túrista til landsins.

Ljósir punktar

2008-10-09T11:34:00.003Z

Fátt er svo með öllu illt að ekki boði nokkuð gott. Ég féll naumlega á TOEFL enskuprófinu í desember, en það er ein forsenda þess að komast í flesta enskumælandi háskóla. Ef ég hefði náð prófinu, væri ég að líkindum í skiptinámi í Kanada núna, en eins og flestir vita eru íslenskir námsmenn erlendis í vondum málum þessa dagana.
Valkostum fyrir ungt fólk fækkar á komandi misserum, með gjaldþrotum fyrirtækja o.fl. Færri valkostir þýða auðveldara val.
Ég þurfti að afskrifa hlutabréf í íslenskum banka í vikunni eins og þúsundir annarra Íslendinga og auðjöfur frá Mið-Austurlöndum. Finn reyndar ekkert sérstaklega jákvætt við það. En mér yfirsést eflaust eitthvað.

Stjúpbræður

2008-09-12T09:49:00.005Z

Kvikmyndin Step Brothers fjallar um tvo menn um fertugt sem búa enn í foreldrahúsum. Annar býr hjá pabba sínum, hinn hjá móður sinni, eða þar til einstæðu foreldrarnir tveir byrja saman og flytja inn saman. Það er ekki næg hvatning til þess að vitleysingarnir tveir finni sér eigin íbúðir, heldur búa þeir hjá turtildúfunum og verða þar með stjúpbræður. Synirnir tveir eru leiknir af John C. Reilly, sem ég man ekki eftir í neinni annarri mynd, og Will Ferrell. Ferrell hef ég hins vegar séð í nokkrum myndum og sá maður er einn sá færasti í sínu fagi, að leika algjöra hálfvita. Það er ekki alveg sama hvernig það er gert og virðist vera ákveðin list. Ferrell er meistari í þessu, ólíkt t.d. Rob Schneider, sem leikur oftast hálfvita, en gerir það á tilgerðarlegan, leiðinlegan hátt. Ferrell er reyndar líka bara fyndinn í framan.

Þetta er ekki mynd með einhverju rosalegu plotti og tvisti, eins og sumir gagnrýnendur virðast gera kröfu um, jafnvel í gamanmyndum. Söguþráðurinn er mjög einfaldur eins og aðalpersónurnar tvær, en myndin heldur samt dampi út í gegn og er í hóflegri lengd en teygir ekki lopann óþarflega eins og er orðið allt of algengt í kvikmyndum. Lærdómurinn sem draga má af myndinni er að fólk ætti að hafa það að markmiði að daga ekki uppi í foreldrahúsum og vera farið þaðan löngu fyrir fertugt, 25 ætti að vera viðmiðunarmörkin. Það vill enginn enda eins og aðalpersónurnar í myndinni.

Einkunn: 8,0.

Heilbrigði?

2008-08-31T14:21:00.004Z

Mynd af mbl.is

Svona var víst um að litast á sýningu á myndinni Mama mia! með ABBA lögunum í aðalhlutverki. Fólkið á myndinni getur varla talist heilbrigt, eitthvað hlýtur að hafa farið úrskeiðis i höfðinu á því, en það söng með lögunum og skemmti sér konunglega eins og sjá má. Ég er ólýsanlega feginn að hafa ekki verið viðstaddur.

Frétt Mbl.is

Ekki lítið land

2008-08-23T09:53:00.001Z

"Ísland ekki lítið land, Ísland stórasta land í heimi!" sagði forsetafrúin við RÚV eftir að forsetinn hafði talað um smæð Íslands í nokkra stund eftir sigurinn á Spánverjum.

Þetta er nú þegar orðið frasi og ætti að fara sem áletrun á boli til stuðnings liðinu.

Það kemur ekki fyrir mig

2008-08-18T21:46:00.005Z

Að fara niður í bæ á skrall og týna yfirhöfn og síma er nokkuð sem kemur ekki fyrir mig. Ég passa upp á hlutina. Ég legg ekki símann frá mér einhvers staðar í reiðileysi og skil hann eftir. Ég hef skipulag á þessu, símann alltaf í sama vasa og tékka nokkuð reglulega á því hvort hann er á sínum stað eins og veski og lyklar.

Það var samt nákvæmlega þetta sem kom fyrir um helgina hjá mér, ég týndi farsíma og jakka niðri í bæ. Fattaði það ekki einu sinni fyrr en daginn eftir. Þá var ekkert annað að gera en að hringja á þá staði sem ég fór á. Enginn staðanna þriggja sagðist hafa hlutina tvo. Fór til öryggis á staðina líka og spurðist fyrir, en án árangurs. Ég rifjaði upp hvar ég hefði tekið upp símann síðast og mundi að þar hafði ég líka lagt hann frá mér á borðið. Svo hafði ég staðið upp frá borðinu og vinur minn líka til þess að fara á barinn, líklega hef ég þá skilið símann eftir á borðinu. Fólk á næsta borði sýndi af sér nokkuð undarlega hegðun eftir á að hyggja, sem ég setti samt ekki í samhengi þá, enda hugsaði ég ekkert út í hvort ég væri með símann eða ekki. Það fólk liggur því undir vissum grun en ég get líklega afskrifað símann. Ætla samt að gera aðeins meiri leit að honum, ef hann verður ekki fundinn í vikulok fæ ég mér nýjan.

Fyrsta verk í leitinni var að sjálfsögðu að hringja í símann. Þá komst ég að því að enn var kveikt á honum en enginn svaraði. Það þýðir að ekki var búið að skipta um kort í honum. Nú tveimur dögum seinna kemur hins vegar strax talhólf, sem þýðir að hann er rafmagnslaus eða að búið er að skipta um kort. Ég geri mér samt veika von um að góma einhvern talandi í símann minn og í jakkanum mínum úti á götu, það væri skemmtilegast.

Þetta þýðir semsagt að það næst ekki í mig í farsíma sem stendur. Fólk sem á erindi við mig verður að gera það eftir öðrum leiðum. Ég er feginn að hafa þó ekki týnt veski og lyklum líka. Svo verð eg bara að vona að ég hafi ekki gleymt vitinu líka í miðborginni á aðfararnótt sunnudags.

Spádómskúlan

2008-08-15T19:04:00.006Z

Blaðamannafundur 1.des. 2008

"Komiði sæl og velkomin. Ég hef boðað ykkur hingað til fundar til þess að tilkynna um fimmta meirihlutann í Reykjavík á kjörtímabilinu. Ég var eini maðurinn sem var eftir sem var nógu geðveikur til þess að ganga meirihlutasamstarfs við Sjálfstæðisflokkinn í borgarstjórn. Nýji meirihlutinn mun hafa sömu einkunnarorð og sá fráfarandi: "Höldum áfram (ruglinu)!". Eins og fram kemur í glæsilegum málefnasamningi okkar munum við halda áfram óráðsíu, spillingu og innri slag sem við munum láta bitna á kjósendum. Átjándu aldar götumynd Laugavegar* kemur við sögu og flugvöllur. En fyrst og fremst munum við kappkosta að láta ekki nægja að gefa skít í kjósendur, heldur munum við moka skít yfir þá. Þetta munum við gera bara af því að við getum leyft okkur það, bara af því að þið, kæru kjósendur, getið ekki losnað við okkur fyrr en eftir tvö ár. Það má gera margan óskundann á þeim tíma"

Jókerinn glottir síðan nánast djöfullega, svipað og Hanna Birna gerði við kynningu nýs meirihluta í gær.

*"Átjándu aldar götumynd" hljómar jafnvel enn betur en nítjándu aldar og verður því notað hjá þessum verðandi meirihluta.

Gott veganesti út í helgina

2008-08-11T22:27:00.004Z

Þegar ég keyrði út úr bænum á föstudag fyrir verslunarmannahelgi varð mér litið á steypuveginn neðan við Esjurætur sem hefur frá því að ég man eftir mér lengst af haft áletrunina:

FLATUS LIFIR! (síðar "Flatus lifir enn!")

en sú áletrun hafði einmitt verið hulin með risauglýsingu frá sparisjóði þegar ég fór í veiðiferð með hóp af góðum drengjum fyrstu helgina í júlí. Þá vorum við allir í bílnum sammála um að þetta væri svívirða og kom til tals að fara einhverja nóttina og smella áletruninni góðu á veginn aftur, þótt enginn okkar eigi feril að baki í veggjakroti. Þó vissi enginn okkar hver eða hvað Flatus væri. Ég ákvað að gúgla "Flatus lifir" og fann umræður um hvað þetta þýddi. Fljótt á litið virtist það umdeilt og talsvert á reiki þótt ýmsir hafi þóst vita hið sanna í málinu. Það er líka betra þannig, ef enginn veit með vissu hið sanna um söguna að baki eða merkinguna.

Þegar ég fór út úr bænum um verslunarmannahelgi sá ég ekki áletrunina, en hún var komin á sinn stað þegar ég ók framhjá á sunnudagskvöld, sem var talsverður léttir, enda veitir hún öryggiskennd. Óvissuástand ríkir í þjóðfélaginu ,efnahagsástand fer versnandi, stór gjaldþrot, uppsagnir og svo framvegis. Við slíkar aðstæður er smá huggun harmi gegn að vita þó að Flatusinn lifir hvað sem á dynur. Flatusinn lætur ekki banka eða aðrar kapítalískar gróðamaskínur drepa sig.

Nú básúna sumir þá skoðun sína að "varðveita beri 19.aldar götumynd Laugavegarins", ekki síst borgarstjórinn sjálfur. Margir hafa bent á tvískinnunginn í þeim hugmyndum, þar sem sárafá hús á Laugavegi séu frá 19.öld. Málið er líklega það að "20.aldar götumynd" hljómar ekki nógu tilkomumikið, það er of stutt síðan tuttugasta öldin var. Þessar verndunarhugmyndir ná ekki síður til bölvaðra hjalla (sem tilheyra meintri 19.aldar götumynd), en flottra húsa. Þetta er því allt hið undarlegasta mál.

Spurningin er sú hvort ekki væri nær að byrja á að friða áletrunina "FLATUS LIFIR!" á steypuveggnum en að standa í þessu rándýra brölti í miðbænum. Hvað segir borgarstjórn við því? Ólafur? Hanna Birna? Gísli Marteinn? Hvaða siðferði hafið þið? - svo ég noti orð Árna Johnsen frá því um árið.

"Sveittur göltur reyndi að pranga inn á mig láni"

2008-08-09T11:03:00.003Z

Ég hjóla til vinnu í sumar. Leiðin er 6,5 km og meðfram Sæbrautinni. Reglan er sú að setja upp gleraugun og fara í endurskinsgulan vinnustakk áður en lagt er í hann, ásamt því að setja upp býsna aulalegan hjálm. Fyrstu vinnudagana reyndi ég að taka strætó en það reyndist vera algjör vitleysa því þá þurfti ég helst að vera lagður af stað 50 mín. áður en ég átti að mæta. Að jafnaði tekur 25 mínútur að hjóla, auk þess sem ég þarf ekki að bruna um einhverja óþarfa ranghala, eins og með strætó, hledur get farið beina leið.

Í dagblöðunum eru oftast nokkrar síður helgaðar "Heilsu og lífsstíl" eða álíka. Það eru undantekningalaust með lélegustu síðum blaðanna. Eina sem ég man eftir að sé lélegra eru öftustu síðurnar sem greina frá því hvort Britney snoðaði sig, var full eða dópuð um helgina eða allt þrennt, eða frá áhyggjum af yngri systur Lindsey Lohan - það stefnir víst bara í óefni með hana. Gæti gengið lengra en eldri systirin í ruglinu...Á "Heilsa og lífsstíll" síðunum má einkum finna örstutta og innihaldslausa texta. Dæmigerð klausa hljómar einhvernveginn svona:
Gaman í berjamó
Nú er berjatíminn genginn í garð. Þá getur öll fjölskyldan farið í bíltúr út fyrir borgina í berjamó. Að tína ber gefur góða og holla hreyfingu og blessuð börnin hafa líka svo gaman að því. Berin má nota í sultur, saft eða bara ein sér, með smá rjóma!

Á þessum sömu síðum er oft rekinn áróður fyrir hjólreiðum og textinn yfirleitt settur í það ljós að hjól sé einhvers konar allsherjar lausn sem fararskjóti. "Krökkunum finnst gaman að hjóla" - "Öll fjölskyldan getur farið saman út að hjóla" - "Hjólreiðar eru hollar og svo þarf ekkert að borga fyrir dýran bensíndropann!" - "Sparnaðurinn finnst fljótt á buddunni!" og svipaðar setningar má finna í slíkri umfjöllun.

Hjól eru langt frá því að vera einhver allsherjar lausn. Foreldri sem þarf að skutla krökkum og dóti hingað og þangað gerir það ekki á hjóli. Bankastarfsmaðurinn sem býr í Grafarvogi hjólar ekki í vinnuna niðri í bæ í jakkafötunum. Það virkar varla mjög vel að vera löðursveittur í því starfi, eða hvað? "Heyrðu, það var einhver löðursveittur göltur í bankanum að kynna fyrir mér það sem hann kallaði lán á afar hagstæðum kjörum""
"Og ætlarðu að taka lánið?"
"Nei, maður tekur nú ekki mark á sveittum göltum"

En flest er hægt með skipulagi, skv. þessu.

$$$ -How to be rich? -$$$

2008-07-27T23:32:00.006Z

Regla 1: Skrifaðu bók um efnið "Hvernig á að verða ríkur?" og seldu vitleysingum í bílförmum. Settu mynd af sjálfum þér á forsíðu með besta spekingssvip sem þú getur dregið fram og vertu helst með gleraugu og helst gráhærður. Þú getur líka bara sett mynd af einhverjum gráhærðum miðaldra karli með gleraugu og órætt lúmskt (jafnvel djöfullegt) glott og sagt að það sért þú.

Regla 2: Ekki eyða ógeðslega miklu í vitleysu. Eyddu sem minnstu í vitleysu og hugsaðu um hverja krónu.

Regla 3: Hugsaðu þig um áður en þú ákveður að taka 90 % húsnæðislán, sem voru rosa fyndin og skemmtileg í kosningaloforðaauglýsingum exbé um árið.

Regla 4: Ef þú átt ekki pening, ekki kaupa stóran jeppa á bullandi óhagstæðu bílaláni. Oft þarf að borga lán til baka, þótt ótrúlegt megi virðast.

Þetta var útdráttur úr bókinni $$$How to be rich?$$$, sem ég ætla að gefa út einn daginn, til þess að verða ÓGEÐSLEGA ríkur. Bókin verður seld á afar hagstæðum kjörum og í mjög haganlegum neytendaumbúðum. Ef ráðunum verður fylgt ætti árangurinn að fara að sjást á undraskömmum tíma og viðkomandi lesendur vita ekki fyrr en þeir eru farnir að raka inn seðlunum.

Svartur riddari

2008-07-27T10:35:00.005Z

"Svarthvíta hetjan mín" eins og Dúkkulísurnar sungu í sífellu?

Nei, hér verður fjallað um Svarta riddarann, nýju Batman-myndina. Eins og fram kemur í myndinni er Batman ekki hetja, heldur svartur riddari. Helsti galli myndarinnar er kannski að nútímatækni er aðeins of mikið nýtt af sögupersónum. Maður sér fyrir sér að ef sú þróun heldur áfram verði Batman í framtíðinni spikfeitur og fari í tölvuna til þess að góma Jókerinn - "SYSTEM LOADING...JOKER CAUGHT" - síðan komi mynd af Jókernum í búri þessu til staðfestingar. Batman fengi sér síðan bjór og snakk til að fagna hetjudáð sinni.

Kostir myndarinnar eru fleiri. Sá sem stelur senunni er Jókerinn, gamansamur með afbrigðum eins og nafnið gefur til kynna. Það sem hann hefur fram yfir flesta aðra vonda karla í sögum er að það er ekkert hægt að semja við hann eða leika á hann, hann er bara snúllandi geðveikur og enginn veit hverju hann sækist eftir eða hvað hann gerir næst. Eina sem fólk veit er að hann sýnir sig ekki opinberlega nema farðaður og hefur gaman að Batman, en þær upplýsingar hrökkva skammt þegar þarf að ná honum. Mig grunar samt að aðsókn á myndina sé þó nokkuð meiri en ella vegna þess að hún skartar látnum manni í aðalhlutverki. Heath Ledger skýtur hinum leikurunum ref fyrir rass í þessarri mynd.

Ég held að það sé ómögulegt að sofna yfir myndinni, því spennan er mikil nánast frá fyrstu mínútu og út í gegn. Christian Bale, sem leikur Batman, er ekkert spes í sínu hlutverki, skilar bara sínu en ekkert meira. Morgan Freeman virðist alltaf leika nokkurn veginn sömu týpuna í myndum, gerir það vel í þessarri eins og oftast áður. Almennt er ekkert hægt að kvarta undan leikurum í myndinni. Flest annað sem máli skiptir er til fyrirmyndar í þessarri mynd.

Einkunn: 9,0.

DJ Bjarni Fel

2008-07-01T10:28:00.004Z

EM í fótbolta er lokið. Allt tal um "fima listamenn" Ítala missti marks. Allt tal um "þýska stálið" missti marks. Spánverjar unnu eins og ég spáði fyrir mót. Spáin gekk reyndar betur eftir en meirihluti spáa fyrir mótið.

Páll Óskar er frekar umdeildur maður. Sumir nánast hata manninn á meðan aðrir virðast dýrka hann. Ég tel mig vera nokkuð hlutlausan. Hins vegar fannst mér hann allt of oft vera fenginn sem DJ á böll í MR í þau fimm ár sem ég eyddi sem nemandi þar. Hann var nánast í áskrift virtist vera. Ég hef aldrei skilið almennilega hvers vegna. Er hann eitthvað betri plötusnúður en hver annar Þorlákur úti í bæ? Spilar hann skemmtilegri lög? Heldur hann uppi betri stemmingu? Stundum sagði hann eitthvað á milli laga, oftast eitthvað eins og "KOMA SVO EMM ERR!". Páll Óskar virðist vera frekar eftirsóttur sem DJ, hvort sem er í MR eða á öðrum vígstöðvum.

Margir söknuðu Bjarna Fel úr lýsingum á EM. Bjarni hefur gott lag á að lýsa, ekki síst vegna góðra frasa sem hann halar út úr erminni í lýsingum. Dæmi:

"...og hann bara með skot!" (oft sagt óháð því hvort leikmaður skýtur úr dauðafæri eða á ævintýralegt skot lengst utan af velli)
"BYLMINGSSKOT!"
"BANG OG MARK!"
"Já, hann er enginn aukvisi [t.d. "í markinu"] hann..."
"Hann fór illa að ráði sínu þarna, hann..."

Ég held að Bjarni væri ekki síðri sem DJ. Þar gæti hann notað sömu frasana og í fótboltalýsingum, slengt þeim fram milli laga og haldið uppi dýrvitlausri stemmingu allan tímann. Stundum gæti hann breytt frösunum smávegis, t.d. sagt "BANG OG LAG!" og skellt næsta lagi á fóninn. Eftir að hafa spilað lag með Jamiroquai við góðar undirtektir gæti hann sagt: "Já, hann er enginn aukvisi í taktinum, hann Jamiroquai". Svo gæti orðið mjög vinsælt partýtrix hjá honum að stoppa lag skyndilega og segja "og hann bara með skot!" (sem viðstaddir vissu vel hvað þýddi - að þeir ættu að panta sér skot á barnum). Síðan gæti hann sett lagið aftur á, á meðan viðstaddir biðu spenntir eftir næsta frasa Bjarna - "BYLMINGSSKOT!" sem að sjálfsögðu þýddi að fólk ætti að skella skotunum í sig. Í gríni gæti Bjarni líka stundum sett á grútléleg lög og tekið þau af eftir skamma stund, t.d. með orðunum: "Hann fór illa að ráði sínu þarna, hann Justin Timberlake" og síðan sett á betra lag með betri tónlistarmanni.

Bjarni í diskóbúrinu?

Jafnréttisverðlaunin

2008-06-26T13:09:00.005Z

Ég varði því miður ekki titilinn í jafréttisverðlaunum trausti.blogspot.com. Hún vann.

Þetta þýðir ekkert annað en að ég þarf að girða mig í brók. Hún hún hún hún hún hún, þetta ætti að hækka stuðulinn fram að næstu verðlaunum. Óíþróttamannsleg framkoma, en nú verður að beita öllum meðulum til þess að endurheimta titilinn að ári. Vona að ég verði ekki dæmdur úr keppni fyrir þetta.

Fótbolti

2008-06-26T12:59:00.004Z

Ágætt að sjá að einhver Englendingur er með fullu viti þegar kemur að umfjöllun um enska landsliðið og gæði þess. Hér er pistill ensks blaðamanns um málið í ísl. þýðingu.

Annars voru Tyrkir ekki langt frá því að fara í úrslit EM. Tippaði á þá fyrir 200 kr. en fékk ekki sexföldunina sem ég vonaðist eftir. Pabbi sagðist ætla að leggja mikið undir á Þjóðverja, taldi að þeir ynnu örugglega. Þeir unnu, en ekki beinlínis örugglega. Spánverjar/Rússar vinna þá í úrslitum, vonandi Spánverjar, því þá verður spá mín fyrir mót um meistara rétt. Rússar eru hins vegar nautsterkir og Spánverjar munu ekki vanmeta þá þótt þeir hafi malað þá í riðlinum.

Um EM og umfjöllun RÚV

2008-06-19T20:37:00.008Z

Jæja, enn einn rosalegur leikur að baki á EM í fótbolta. Sennilega er þetta besta keppni sem ég hef séð. Fyrsta umferðin var ekkert spes á heildina, fyrir utan stórsigur Hollendinga á Ítölum. Það er aldrei leiðinlegt að sjá Ítali jarðaða á velli, að ekki sé talað um þegar það er gert með slíkum töktum.

RÚV hefur haldið ágætlega utan um keppnina en þó eru vissir menn að lýsa leikjum sem ættu bara að vera heima. Hlutdrægnin er á köflum gjörsamlega óþolandi. Lýsarnir í kvöld voru of hliðhollir Þjóðverjum og það var dómarinn líka. Sambærileg brot liðanna fengu ólíka meðferð, Þjóðverjar komust upp með meira. Það versta var hins vegar þegar Ballack kom Þjóðverjum í 3-1 með kolólöglegu marki, þar sem hann hrinti Ferreira mjög greinilega svo hinn síðarnefndi missti jafnvægið. Gummi Torfa (sem er einn sem ætti að vera heima en ekki að lýsa) talaði um að hann hefði "stuggað aðeins við honum", enda á bandi Þjóðverja. Portúgalir urðu ráðvilltir í kjölfarið og fóru að skjóta á markið allt of snemma í stað þess að spila sig í gegnum vörn Þjóðverja eins og þeir voru búnir að gera nokkrum sinnum í leiknum.

Versta dæmið um hlutdrægni lýsenda er samt ekki þessi leikur, þegar Adolf Ingi og Willum lýstu leik Ítala og Rúmena lýstu þeir eingöngu út frá sjónarhorni Ítala, sögðu hvað Ítalirnir þyrftu að gera, ættu að gera, og veltu síðan framhaldinu fyrir sér hjá þeim. Rúmenar virtust ekki vera til í orðabók þeirra félaga. Adolf hrópaði líka "VÍTI!" eða VÍTASPYRNA!" þrisvar að mig minnir undir lok leiksins þegar Ítalir köstuðu sér niður til að fiska. Ekki sérstaklega fagmannlegt. Nokkuð er um að menn ákveði fyrir fram hverjir séu bestir, Ítalir eru "frábærir" af því að þeir eiga stærri sögu á stórmótum en Rúmenar, það sama má segja um Frakka, sem í raun voru sendir heim með skottið á milli lappanna í þessarri keppni. Þó vinna lið ekki leiki á fornri frægð og forn frægð er ekki ávísun á góðan bolta. Svo virðist líka oft gilda lögmálið fleiri þekktir leikmenn í liði = betra liðið. Þetta sást t.d. í upphitunarþætti Þorsteins J. kvöldið fyrir keppni, þegar talað var um Englendinga stóran hluta af þættinum þrátt fyrir að þeir séu ekki einu sinni með.

Ég hef horft á tvo leiki á BBC, í stað þess að hlusta á Snorra eða Adolf lýsa. Þar má yfirleitt treysta á fagmannlega umfjöllun, kempur að lýsa og slíkt og hlutleysi í hávegum haft með sárafáum undantekningum.

Einn maður hefur borið af í lýsingum á RÚV, hann heitir Valtýr Björn. Sérstaklega fannst mér hann fara á kostum í besta leik keppninnar hingað til, Holland - Frakkland. En umfram allt, frábær keppni og ég vona að Spánverjar jarði Ítali á sunnudagskvöld, því fyrr sem þeir fara heim, því betra. Held mig við spána um sigur Spánverja í keppninni. Annars græt ég ekki ef Hollendingar hampa titlinum, sérstaklega ef þeir halda áfram að sína sömu meistaratakta og hingað til. Svo hef ég reyndar oftast haldið með þeim á stórmótum.

Bjarndýr

2008-06-17T07:16:00.009Z

Aðalfrétt flestra íslenskra fjölmiðla snýst um annan ísbjörninn sem villst hefur til Íslands á skömmum tíma. Ísbjörninn sem kom um daginn var plaffaður niður stuttu eftir að hans varð vart. Margir urðu hryggir, reiðir, sárir og mig minnir að ég hafi heyrt fleiri lýsingarorð um aðferðina. Talsmaður Greenpeace lýsti strax undrun og fordæmingu á þessari einföldu leið til að koma í veg fyrir áframhaldandi hættu af birninum. Nokkrir fjölmiðlar utan lands fjölluðu víst einnig um málið og lýstu á neikvæðan hátt. Ísbirnir væru friðaðir og algjörlega ólýðandi að skjóta þá.

Mér fannst og finnst þessar fordæmingar frekar fáránlegar. Það má vel vera að ísbirnir séu friðaðir en flestir geta þó viðurkennt að þeir séu hættuleg rándýr. Það hefði verið dýrt spaug og mun tímafrekara að freista þess að deyfa björninn og veiða í búr. Neikvæða umfjöllunin hafði hins vegar þau áhrif að ákveðið var nú í kjölfar komu annars bjarnarins að hafa samband við NATO - bandamenn okkar, Dani, en sérfræðingar þaðan ætla að koma og góma bjarndýrið lifandi og flytja aftur til heimkynna þess. Fréttir af málinu hafa borið léttan keim af æsifréttamennsku, fjölmiðlar gera sér aldeilis mat úr því þegar eitthvað gerist nú í árlegri gúrkutíð sumars. Kannski er þessir fyrstu tveir ísbirnir bara forsmekkurinn af því sem koma skal, kannski verður það ísbjarnaher næst, þá verður eins gott að bandamenn Íslands verði til taks.

Seinni ísbjörninn virðist vita vel að hann er stjarnan og sýnir af sér frekar handahófskennda hegðun. Hann fær sér að éta úr einu hreiðri og leggur sig síðan í smástund með ístruna út í loftið. Eftir smá blund gæðir hann sér á innihaldi næsta hreiðurs og leggur sig aftur og svo koll af kolli. Ef marka má fréttir Ríkisútvarpsins í morgun er vindátt mjög hagstæð að því leyti að björninn finnur ekki mannaþef í lofti. Á meðan svo er heldur hann örugglega bara áfram að fara milli hreiðra og leggja sig.

Jarðskjálftinn um daginn

Jarðskjálftann á suðurlandi um daginn skítnýttu margir fjölmiðlar til umfjöllunar, það hefði varla verið hægt að fjalla meira um hann. Aukafréttatími var hjá Sjónvarpinu, Bogi Ágústsson mætti í myndver og fjallaði um skjálftann og talaði við nokkra valinkunna viðmælendur, sem reyndar sögðu allir nokkurn veginn það sama, "Talsvert eignatjón en ekkert tjón á fólki", svo var fimm sekúndna myndskeið (eða fyrstu myndir) af skjálftanum spilað aftur og aftur og aftur, örugglega minnst 20 sinnum. Ég hafði á tilfinningunni að Bogi nennti alls ekki að vera þarna, enda leit hann mikið í kringum sig og það virtist vera fararsnið á honum, sem er ekki skrýtið því þarna sat hann og þurfti að þylja upp það sama aftur og aftur og heyra í viðmælendum sem sögðu ekkert nýtt. Svo sást að hann var að slá eitthvað inn í tölvu inn á milli, flestir hafa eflaust haldið að hann væri að skoða eitthvað tengt skjálftanum en ég gæti alveg eins trúað að hann hafi bara verið í Minesweeper eða að leggja kapal, lái honum hver sem vill. Þetta er sennilega það sem fólk vill, þegar suðurlandsskjálftinn reið yfir á þjóðhátíðardaginn fyrir nokkrum árum voru margir mjög æstir og stór orð látin falla um að Sjónvarpið hefði "brugðist almannavarnahlutverki sínu" með því að rjúfa ekki beina útsendingu frá íþróttaleik um leið og fyrstu fréttir komu af skjálftanum. Þó gat væntanlega allt þetta fólk kveikt á útvarpi til þess að fá upplýsingar um skjálftann eða kíkt á netið, þótt netið sé orðið útbreiddara nú en það var þá.

Nú hins vegar brást Sjónvarpið þessu sama fólki ekki, aukafréttatíminn var á sínum stað í tæka tíð. Fólk fær sennilega öryggistilfinningu af því að sjá Boga í myndveri fjalla um jarðskjálfta, sem er þannig að vönduðustu dömubindi blikna í samanburði.

Gleðilega þjóðhátíð.

Silvester time

2008-06-08T12:05:00.007Z

Ég hef sagt nokkrum lesendum frá einum samstarfsmanni mínum í álverinu síðasta sumar. Hann var pólskur og talaði ensku við okkur með áberandi hreim. Hann hafði búið á Íslandi í fáeina mánuði ef ég man rétt. Sennilega er leitun að öðrum eins meistara.

Hann ávarpaði mig oftast "Hey, Gúmmí", en nöfn starfsmanna eru alltaf framan á hjálmunum og á fötunum. Eitt af því fyrsta sem hann tilkynnti mér var: "Hey Gúmmí, Friday...I get the money" (sagt í hálfgerðum mafíósatón). Ég áttaði mig ekki strax á hvað hann ætti við og spurði "Ok...what money?" og þá svaraði hann "paycheck", sem var rétt - útborgunardagur í álverinu var næsti föstudagur.

Skömmu eftir útborgunardaginn mikla kom hann frekar vonsvikinn og sagði okkur að hann hefði bara fengið í kringum 150.000 kr. útborgaðar, sem hljómaði óeðlilega lítið sem mánaðarlaun, enda höfðum við hinir fengið mun hærra. Svo talaði hann við fólk á skrifstofunni til þess að fá skýringar og þá kom í ljós að hann hafði ekki skilað inn skattkorti, sem var kannski ekkert skrýtið, því enginn hafði sagt honum neitt um það. Eftir það kom hann til mín og sagði: "Hey Gúmmí, they tell me I have to get this skatkort...this is true?!" og ég gat staðfest að það væri rétt.

Einn daginn sagði annar samstarfsmaður honum frá áramótunum á Íslandi, að þau væru mögnuð og lýsti flugeldasprengingum og partýhaldi með miklum tilþrifum fyrir honum. Eftir smáskammt af fjálglegum lýsingunum greip sá pólski inn í og sagði "aaa, you mean silvester time?" og hinn samstarfsmaðurinn hló bara og sagði "silvester time, what the fuck is that?". Þá reyndi sá pólski að útskýra það fyrir honum að hann ætti við áramótafögnuð eða áramót og hinn skildi um leið. Síðan skrapp hinn samstarfsmaðurinn frá. Sá pólski virtist ekki viss um að það hefði alveg komist til skila hvað "silvester time" væri og tók upp krítina sína og skrifaði á gráa steynsteypuna inni í kerskála "2006 -> 2007", benti á það og sagði við mig "you know Gúmmí, when there is maybe 2006, an then there comes 2007...that is silvester time".

Þetta er það helsta sem ég man eftir en það var fleira gull sem kom frá þessum ágæta manni.

Er Sylvester Stallone forsenda góðra áramóta í Póllandi?

Tónleikar Super Mama Djombo á Nasa

2008-06-07T11:52:00.007Z

Hljómsveitin Super Mama Djombo hélt tónleika á Nasa síðasta laugardagskvöld. Fyrir tónleikana vissi ég lítið um hljómsveitina, annað en að hún kæmi frá Gíneu-Bissá. Hljómsveitin spilar Afríkutónlist "með kúbönsku ívafi" stóð einhversstaðar.

Þetta voru frekar góðir tónleikar, hressandi taktur, spilamennska og söngur. Sviðsframkoman var líka fín. Þegar seig á sinni hluta tónleikanna var eldri söngkona sveitarinnar í aðalhlutverki, hún virðist vera leynivopnið sem er geymt þar til í seinni hlutanum. Svaðaleg rödd þar á bæ. Reyndar gæti ég trúað að hún héti Super Mama og að allir hinir meðlimir sveitarinnar væru afkomendur hennar, með ættarnafnið Djombo. En það eru nú bara getgátur.

Eitt var hins vegar til að spilla stemmingunni, það var þegar Egill Ólafsson Stuðmaður birtist á sviðinu eins og skrattinn úr sauðarleggnum. Egill virðist líta frekar stórt á sig og virtist telja sjálfan sig aðalnúmerið þegar hann var á sviðinu. Blaður hans á milli laga var misheppnað. Ég leit yfir salinn þegar Egill birtist og sá grettur á nokkrum andlitum. En svo sá ég líka einhverja sem virtust kunna að meta þennan aukamann. Hann söng á íslensku og passaði alls ekki þarna inn í. En sem betur fer var hann ekki með í nema þremur lögum eða svo.

En á heildina voru þetta sem sagt góðir tónleikar og ég mun fjárfesta í plötu með Super Mama Djombo til þess að fá Gíneu-Bissá beint í æð heima í stofu.

Einkunn (ef Egill er undanskilinn): 8,5.
Einkunn (að Agli meðtöldum): 8,0.

EM í fótbolta - spá

2008-06-06T17:23:00.002Z

EM hefst á morgun með tveimur leikjum. Eftirfarandi er spá mín um framgang mótsins og úrslit.

Riðlakeppni (lið sem fara áfram í 8-liða úrslit feitletruð):
A-riðill
Sviss
Tékkland
Portúgal
Tyrkland

B-riðill
Austurríki
Króatía
Þýskaland
Pólland

C-riðill
Holland
Ítalía
Rúmenía
Frakkland

D-riðill
Grikkland
Svíþjóð
Spánn
Rússland

Meistarar: Spánverjar.
Markakóngur: Ruud van Nistelrooy.

"Spánverjum gengur alltaf illa á stórmótum" er tugga sem hefur margoft heyrst. Þeir hafa samt orðið Evrópumeistarar, það er bara mjög langt síðan. Það sem ég held að sé Spánverjum til tekna nú, frekar en áður er að talsvert fleiri leikmenn spila utan Spánar en á undanförnum stórmótum.

Ég ætla að halda með Spánverjum í þetta skiptið, kannski aðallega vegna þess að Liverpool á flesta fulltrúa þar. Spáin er því blönduð óskhyggju, eins og oft gildir um slíkar spár.

Hvít húfa

2008-05-31T10:17:00.006Z

Systir mín útskrifaðist sem stúdent úr MH um síðustu helgi. Hún er rétt rúmum fjórum árum yngri en ég, en útskrifaðist sem stúdent núna tveimur árum á eftir. Ef þetta heldur svona áfram tekur hún fram úr mér áður en langt um líður. Ég get þá huggað mig við það að kannski verður hún komin langt fram úr mér á gamals aldri og fer á undan á elliheimilið.

Þessi mynd náðist í veislunni.

Frá vinstri: Ég, amma, Nína, afi.

Hefur aðstoðarlandlæknir tapað áttum?

2008-05-31T10:00:00.002Z

Móðir mín sendi mér tölvupóst á dögunum með yfirskriftinni Hefur aðstoðarlandlæknir tapað áttum? Inni í tölvupóstinum stóð síðan ekkert nema "Hefur aðstoðarlandlæknir tapað áttum?".

Þetta hefði verið frekar skemmtilegt ef samhengið hefði verið ekkert, en hún hafði áður beðið mig að senda sér grein úr greinasafni Moggans með þessum titli, sem hún greinilega ásælist, en hefur ekki aðgang sjálf. Ég mundi reyndar ekki strax eftir þessu þegar ég sá póstinn, þannig að þetta virtist frekar skrýtið.

Eitt og sér hefði þetta samt verið best, knýjandi spurning sem ég ætti síðan að svara að vel athuguðu máli. Auðvitað ætti maður að fara að stunda þetta, að senda fólki sem maður þekkir undarlegar spurningar í tölvupósti, eða bara á póstkorti, það er eiginlega betra.

Eurovision

2008-05-25T12:17:00.004Z

Eurovision virðist vera að færast frá því að vera fyrst og fremst vondulagakeppni, yfir í að vera strippkeppni. Sigurlagið í ár var klárlega ekki gott lag, en söngvarinn tók nett stripp sem hefur væntanlega reddað slurk af atkvæðum kvenna. Konur eru sennilega 60-70% þeirra sem kjósa í símakosningunni, og þar með var sigur Rússa tryggður. Það var einmitt þetta sem kvenstripparar kepninnar, sem voru meirihluti keppenda, klikkaði á, þ.e. að kvenatkvæði eru líkast til fleiri og sá markhópur þar með stærri. Svo spilaði inn í að þar var samkeppnin meiri, þær voru svo margar. Og Grikkland, hvað var það? Hvergi var til sparað í samfarasveiflunum á sviðinu. Lélegt lagið var algjört aukaatriði.

Annars fannst mér finnska lagið bera af í keppninni. Fínt rokklag, betra en sigurlag Lordi, en engir rosalegir búningar, sem hefur sennilega spillt fyrir þeim. Hvaða álit sem fólk kann að hafa á íslenska laginu eða flytjendum þess, er ekki hægt að gagnrýna flutninginn, því hann var 100% og það er meira en segja má um suma hinna kependanna.

F. Magnússon

2008-05-17T09:45:00.006Z

Tómas gaukaði að mér góðri hugmynd á dögunum. Hann spurði hvort ég væri kominn með djobb hjá borginni, verandi F. Magnússon. Þetta er klárlega borðleggjandi dæmi, nú þarf ég bara að fara á fund Ólafs F. og nefna þetta við hann. Það hlýtur að vera hægt að hliðra aðeins til fyrir mig þarna hjá borginni, búa jafnvel til nýja stöðu og svo fæ ég launatékka upp á tæpa milljón á mánuði. Úthverfastjóri, hvernig hljómar það?

Svo kemur máltakið "allt er þá er þrennt er" við sögu og við félagarnir þrír deilum og drottnum yfir borginni.

Heilög þrenning?

Munaður

2008-05-03T18:32:00.003Z

Í dag átti sérkennilegt atvik sér stað í enska boltanum. Í stöðunni 3-1 fyrir Man.Utd. gegn West Ham tók Luis Nani (Man. Utd.) sig til og skallaði Lucas Neill (West Ham) og fékk rautt spjald að launum. Þetta þótti nokkuð sérstakt, einkum í ljósi góðrar stöðu Man. Utd. í leiknum og þar með í baráttunni um meistaratitilinn.

En svo má líta á þetta öðruvísi, hvenær átti Nani að leyfa sér þann munað að skalla Neill, ef ekki í þessarri stöðu? Þetta var a.m.k. betra tækifæri til sérkennilegrar framkomu heldur en þegar Riise skoraði fáránlegt sjálfsmark um daginn og jafnaði fyrir Chelsea eftir að uppbótartíma var lokið í mikilvægasta leik tímabilsins til þessa hjá Liverpool. Þetta var líka betra tækifæri en þegar Zidane tók sig til og skallaði Materazzi niður í úrslitum HM. Þar var staðan ekki jafn góð, fórnarkostnaðurinn var meiri, alveg eins og hjá Riise. Þannig að kannski var þetta ekkert svo slæm hugmynd hjá Nani.

Rödd alþýðunnar?

2008-04-24T08:18:00.005Z

Eins og flestir vita náði yfirgangur og heimska manna sem kalla sig fulltrúa vörubílstjóra, jafnvel fulltrúa almennings, nýjum hæðum í gær, þegar þeir lokuðu Suðurlandsvegi. Þeir hundsuðu ítrekað tilmæli lögreglu og sýndu af sér dólgslæti. Sá maður sem oftast hefur talað við fjölmiðla sem fulltrúi hópsins sagði lögregluna hafa átt upptökin að óeirðunum sem fylgdu í kjölfarið, hún hefði hindrað mann sem ætlaði að komast að kyrrstæðum vörubíl sínum þegar hann loksins ætlaði að færa hann. Orsök og afleiðing vefjast greinilega ekki fyrir þeim manni. Forsætisráðherra sagði í viðtali við kvöldfréttir Ríkissjónvarpsins eitthvað á þá leið að margir teldu sig þurfa að koma málum inn á borð ríkisstjórnarinnar, en þeir hefðu ekki allir stóra trukka til þess. Ég veit ekki hvernig ástandið væri ef þeir allir hefðu trukka og væru allir nógu vitlausir til þess að nota þá á sama hátt og umræddir menn.

Langt er síðan ég hef hlustað á Útvarp sögu. Hins vegar ákvað ég að stilla inn á hana í morgun, bjóst við að heyra í hvumsa hlustendum um atburði gærdagsins og kostulegar túlkanir og tilþrifamiklar lýsingar. Þegar ég kveikti hringdi kona inn, sem var greinilega "fastakúnni", því umsjónarkonan Arnþrúður heilsaði henni með nafni. Hún talaði ekki um óeirðir í gær heldur sagði kampakát frá "húsráði sínu til ungra kvenna" eins og hún orðaði það, "sem færu nú að raka á sér lappirnar af kappi í tilefni sumars", "til þess að losna við broddana", en það var að "kveikja bara í þeim!" sagði hún og hló dátt og upplýsti að hún hefði beitt þessu eitraða bragði allt frá 1986.

Ég hélt að óeirðir gærdagsins væru efnið sem brynni á hlustendum, en þetta var næsti bær við.

Blaðamannafundur

2008-04-19T08:41:00.005Z

Ég mæli með blaðamannafundi með Avram Grant, knattspyrnustjóra Chelsea eftir leik þeirra gegn Everton á fimmtudagskvöld. Forsaga málsins er sú að þegar örfáir leikir eru eftir í ensku úrvalsdeildinni stendur baráttan um meistaratitilinn á milli Manchester United og Chelsea. Fjöldi fjölmiðla hefur afskrifað Chelsea í baráttunni fyrir löngu og gefið sér að Manchester verði meistarar. Menn víla jafnvel ekki fyrir sér að slá upp stríðsfyrirsögnum um hversu öruggt það sé.
Ágætt er að hafa í huga að fyrir rúmum tveimur mánuðum eða svo sló fjöldi fjölmiðla því föstu að Arsenal yrðu Englandsmeistarar, ekkert gat komið í veg fyrir það. Þeir spiluðu stórbrotinn sóknarbolta sem enginn gat stoppað og allt það. Í dag er staðan önnur, Arsenal er fallið úr Meistaradeildinni og tap þeirra gegn Man. Utd. um daginn rak síðasta naglann í líkkistuna í deildinni, svo að allar titilvonirnar eru fyrir bý á þeim bæ.

Ofan á það að ýmsir ónefndir fjölmiðlar hafi hampað Man. Utd. og um leið gert lítið úr möguleikum Chelsea bætist að erfiður leikur þeirra gegn Everton, sem átti að fara fram í dag (laugardag), var færður og leikinn sl. fimmtudag nánast fyrirvaralaust, til þess að Sky sjónvarpsstöðin gæti sýnt leikinn beint. Það þýddi að Chelsea spilaði bæði á mánudag og fimmtudag í vikunni sem leið. Tilfærsla leiksins þýddi að sumir miðaeigendur misstu af leiknum o.fl. Samsæriskenningar hafa verið búnar til af minna tilefni.

Af þessu ætti að vera ljóst að Avram Grant var ekki pirraður að ástæðulausu á fréttamannafundinum eftir leikinn. Hér eru nokkrar spurningar og svör af fundinum:

Áttuð þið skilið að vinna, Avram?
A: "já"

Hvað varstu ánægðastur með í frammistöðu liðsins í kvöld?
A: "Ég er ánægður"

Hvað varstu sérstaklega ánægður með?
A: "Ég veit það ekki"

Hefurðu einhver skilaboð til stuðningsmanna Chelsea?
A: "Eruð þið fulltrúar stuðningsmanna Chelsea?"

Þeir hljóta að trúa að þið eigið enn möguleika á titlinum, hefurðu einhver skilaboð til þeirra?
A: "Engin skilaboð"

Þú virðist ekki eins málglaður og venjulega, Avram. Er það vegna þess að Sky sjónvarpsstöðin lét færa leikinn yfir á fimmtudag?
A: "Kannski er það vegna ykkar. Ég veit það ekki. Það er í lagi með mig."

Tveimur spurningum síðar...
Er þetta vegna Sky?
A: "Nei. Sky er ágæt stöð. Mér finnst gaman að horfa á hana."

Viðtalið í heild má nálgast hér.

Spennan er töluverð í fótboltanum þessa dagana, bæði í Meistaradeild og ensku deildinni. Man. Utd. á möguleika á sigri í þeim báðum. Hins vegar er líka möguleiki að þeir vinni hvorugt, sem mér þætti alls ekki leiðinlegt.

Sveina Múladóttir

2008-04-13T00:16:00.004Z

Svalbarði, þáttur Þorsteins Guðmundssonar og Ágústu Evu Erlendsdóttur fer afar vel af stað. Nú eru fyrstu tveir þættirnir búnir og báðir voru afbragðsgóðir. Sketsarnir hafa verið eins og best verður á kosið. Hvað á þetta að þýða? - horn Sveinu Múladóttur í þættinum er frekar óborganlegt, ég hló a.m.k. mjög mikið að því. Það má varla á milli sjá, hvort er betra gervið og grettan á henni eða óstöðvandi stólpanöldurkjafturinn.
Grínþættirnir Klovn hafa verið á dagskrá RÚV á fimmtudagskvöldum síðan fyrir jól ef ég man rétt. Þeir þættir eru einir bestu grínþættir sem sést hafa á skjánum. Samtöl félaganna eru mjög góð og þeirra sjónarhorn á málin. Ég veit ekki hvaðan þeir fá hugmyndirnar, en í byrjun er þess alltaf getið að þættirnir séu byggðir á raunverulegum atburðum. Alltaf þegar maður heldur að aðstæður í þáttunum geti ekki orðið vandræðalegri, þá verða þær það. Samt vill aðalpersónan voða vel.
Sá Spaugstofuna í kvöld. Hló ekki svo mikið sem einu sinni.

Lok vinnuviku

2008-03-14T18:57:00.005Z

Oftast reyni ég að forðast að fara út að keyra í föstudagstraffíkinni, sé þess kostur. En í dag þurfti að versla í matinn, ískápurinn var gapandi tómur. Þegar ég keyrði inn á litla bílastæðið við búðina var það frekar pakkað. Einn bíll var að bakka á móti akstursstefnu þeirra sem komu inn á stæðið, ég bakkaði þá smávegis, hélt að hann væri að bíða eftir stæði sem var að losna rétt fyrir framan. Hann bakkaði aðeins meira, ég bakkaði aðeins meira. Síðan ætlaði hann að bakka enn meira, þá bakkaði ég ekki. Þá stökk hann öskuillur út úr bílnum og baðaði út höndunum, settist síðan aftur inn. Fleiri bílar voru komnir aftan við mig sem ætluðu inn á stæðið. Maðurinn stökk aftur út úr bílnum og öskraði "FARÐU FRAMHJÁ!" og virtist vera endanlega að missa vitið. Ég fór framhjá og fann laust stæði, en "nota bene" bílar sem voru að fara höfðu verið að keyra þeim megin eins og venjan er á svona bílastæðum. Var að velta fyrir mér hvort ég ætti að svara honum einhverju en ákvað að sleppa því, nógu brjálaður var hann fyrir. Næsti bíll á eftir mér var núna aftan við tryllta gaurinn, sem trylltist enn meira og öskraði á fólkið í þeim bíl að fara framhjá. Það fór framhjá og hló að manninum sem varð ekkert minna trylltur við það. Veit ekki hvað gerðist næst því ég fór inn að versla.

Hann var á sjö manna bíl og kona og þrír eða fjórir krakkar voru með í bílnum. Eflaust hefur hann verið að farast úr stressi nýkominn úr vinnu og eitthvað. Svo gæti ég ímyndað mér að krakkarnir hafi sagt aftur í: "Pabbi, kanntu ekki að keyra? Af hverju förum við ekki heim?" o.s.frv.

Gleðibankinn

2008-03-01T09:10:00.004Z

Vaknaði í morgun með lagið Gleðibankann á heilanum mér til mikillar furðu. Reyndar hálfvaknaði ég og fannst jafnvel eins og ICY-söngflokkurinn væri inni hjá mér allur með tölu að syngja lagið á fullu blasti. Ég bjó mig undir að hreyta einhverjum skammaryrðum í þau og henda þeim út og spyrja þau "Vitiði hvað klukkan er!?!" og eitthvað álíka gáfulegt.

Svo vaknaði ég almennilega, sneri mér við og leit upp til þess að fullvissa mig um að þetta lið væri ekki í herberginu. Þau voru hvergi sjáanleg svo að ég gat farið aftur að sofa og geymt skammarpistilinn til betri tíma.

Hlaupár

2008-02-29T17:34:00.001Z

Ég veit ekki hvort ég nenni ad blogga lengur. Kannski blogga ég hédan í frá bara 29.febrúar.

Fletcher? Kuyt?

2008-02-20T17:07:00.003Z

Í gær vann Liverpool Inter Milan 2-0 á Anfield í Meistaradeild. Inter Milan sótti ekkert í leiknum fyrir utan aðeins pressu í tvær mínútur eða svo í seinni hálfleik. Dirk Kuyt af öllum mönnum skoraði fyrra mark Liverpool, fínt mark. Í síðustu færslu lýsti ég einmitt frati á þann mann.

Svipað var uppi á teningnum um helgina þegar Man. U. keppti við Arsenal í Ensku bikarkeppninni og jarðaði þá. Þá sá ég byrjunarliðin fyrir leik, Rooney einn frammi og Fletcher í liðinu sem mér fannst benda til að Ferguson legði litla áherslu á sigur. Síðast þegar ég sá Fletcher spila svo ég muni var hann algjör grínari. En nei, nei, maðurinn skoraði tvö mörk og var einn bestu manna í leiknum sem United burstaði 4-0.

Reyndar er furðualgengt að íþróttaspekingar, t.d. þeir sem lýsa leikjum, séu úti á þekju. Því ótrúlega oft virðist gerast nákvæmlega það sem þeir töldu útilokað og það lið skorar sem þeir töldu að gæti aldrei skorað o.s.frv. Það er frekar fyndið þegar þeir láta fúkyrðin fossa út um einhvern leikmann og hann skorar síðan glæsilegt sigurmark og þaggar allrækilega niður í þeim.

Dagar Benitez taldir hjá Liverpool

2008-02-17T11:14:00.004Z

Í dag er Liverpool, sigursælasta lið Englands frá upphafi, orðið aðhlátursefni um heim allan. Knattspyrnustjórinn Rafael Benitez tekur ótrúlega handahófskenndar ákvarðanir við byrjunarliðsval hvað eftir annað og það sama má segja um innáskiptingar. Menn nenna varla að vera að standa sig vel í leikjum þegar þeir vita ekkert hvort það þýði fleiri byrjunarliðsleiki í kjölfarið. Dirk Kuyt og John Arne Riise hafa t.d. verið eins og beljur á svelli svo til allt tímabilið, en það hindrar ekki að þeir fái hvern leikinn á fætur öðrum í byrjunarliðinu og geta leyft sér að vera drulluslakir hvað eftir annað.

Benitez er að verða eins og villti Villi borgarfulltrúi. Gerir síendurtekin "klaufaleg mistök" en einn og einn reynir samt ennþá að verja þá. "Benitez vann nú Meistaradeildina með liðið 2005!" segja menn til marks um ágæti hans sem þjálfara. Vissulega mjög mikið afrek með þá leikmenn sem hann hafði þá. En málið er að það er ekki hægt að lifa endalaust á fornri frægð. Það þýðir ekkert að ætla að vinna Meistaradeild 2005 og skemma síðan liðið.

Rafmagnsbannið

2008-02-16T13:11:00.002Z

Í gær var vísindaferð á stærsta skemmtistað í heimi, allt vitlaust auðvitað.
Lentum síðan allt í einu inni í samkvæmi Frjálslynda flokksins á Kaffi Reykjavík eftir slappa stemmingu á Glaumbar. Veit ekki hver átti hugmyndina að því en þangað fórum við. Jóhannes eftirherma fór mikinn.
Galandi stemming var á Kaffi Cultura, minni á Vegamótum.
Rafmagnslaust var í miðbænum í klukkutíma í nótt. Að sitja inni á bar í rafmagnsleysi er mjög spes. Engin tónlist og bara tekið við reiðufé á barnum.

Ég held að það gæti verið áhugavert að prófa næst að setja rafmagnsbann, nú þegar reykingabannið hefur verið við lýði síðan í sumar. Fleiri bönn sem mætti prófa á skemmtistöðum:

Áfengisbann.
Stólabann.
Borðabann.
Fólksbann.

Svo gæti nefnd skilað áliti um árangur af hverju banni.

Sóðalegur verðmunur

2008-02-14T17:46:00.006Z

Var að fá skólabók sem var pöntuð af Amazon.com. Þetta er nýtt eintak og kostar með öllum gjöldum rétt tæpum 3000 kr. minna en í Bóksölu stúdenta. Fyrir tveimur vikum fékk ég aðra bók senda, frá Amazon í Bretlandi, og þar var munurinn rúmur þúsund kall á nýju eintaki, miðað við verð Bóksölu stúdenta.

Niðurstaða: Að kaupa erlendar bækur í Bóksölu stúdenta er eins og að pissa í skóinn sinn.

Ekki fréttir

2008-02-11T18:23:00.000Z

Boðað var til blaðamannafundar í dag. Þar tilkynnti Vilhjálmur fyrrverandi og hugsanlega verðandi borgarstjóri að hann segði ekki af sér. Hvað á skrípaleikurinn að ganga langt? Hvað ætlar maðurinn að draga flokkinn langt niður í svaðið með sér?

Kosningar

2008-02-08T23:29:00.000Z

Kosningum til stúdentaráds er lokid. Mitt atkvaedi dugdi ekki til ad fella meirihlutann. Thá er spurning hvort einhver úr borgarstjórn Reykjavikur getur ekki maett til ad fella slikan meirihluta stúdentaráds, med einhvers konar eitrudu politisku trixi eins og tidkast á theim baenum.

Ég var buinn ad ákveda ad kjósa Obama sem forseta Bandaríkjanna. Ég hafdi svosum ekki hugmynd um fyrir hvad hann stód, en hann er alltaf í fréttum og svona, virdist vera ágaetis gaur. Sídan tók ég netpróf sem maeldi mig med hvorki meira né minna en 65% studning vid Hillary Clinton, en ekki nema 53% vid Obama. En thetta skiptir ekki ollu, adalatridid er ad repúblíkani komist ekki í stólinn. Hef enga trú á thessum John McCain eftir ad hafa kikt á hans áherslur. Hann yrdi án efa bara beint framhald af Bush, hinum alraemda.
----
Ég er ekki í útlondum, heldur ad blogga ur eigin tolvu, minni fyrstu. Hun er gaedd theim skemmtilega fitus ad vanta séríslenska stafi, sem gefur textanum framandi blae.

Super Bowl

2008-02-04T18:31:00.000Z

Í gær var bein útsending frá úrslitum í Bandaríska fótboltanum. Til þess að vera maður með mönnum stillti ég inn rétt fyrir leik og beið iðandi eftir þessum heimsviðburði. New York Giants og New England Patriots mættust. Spekingarnir voru mættir inn í stúdíó og ræddu málin með kaffi og kleinur undir dynjandi rappmúsík. Giants voru "underdogs" að sögn spekinganna, svo ég ákvað að halda með þeim.

Leikar hófust, gríðarleg spenna, svo var allt stopp eftir nokkrar sekúndur. Auglýsingahlé voru gerð hvað eftir annað og spekingarnir gripu inn í þess á milli inni í stúdíó. Leikurinn virtist aldrei vera í gangi nema svona eina mínutu í senn, svo var stoppað. Hvers konar sjónvarpsefni er þetta?

Leikmenn virtust sumir vera feitir, sem sjaldgæft er að sjá i keppnisíþróttum. Síðan voru þeir margir málaðir í framan með stríðsmálningu, sem var nokkuð kjánalegt. Ég gafst upp á að horfa þegar annar leikfjórðungur var nýhafinn, engu nær um það fyrir hvað þessi viðburður er svona vinsæll.

Meint ósmekkleg Spaugstofa

2008-01-27T21:59:00.000Z

Stundum sér maður skrif virkustu moggabloggara, enda er þeim er nánast troðið í andlitið á lesendum Mbl.is. í dálkinum heitar umræður og við hliðina á fréttum. Nú virðast ýmsir vera snarbrjálaðir yfir síðasta Spaugstofuþætti, ein kona kallar þátinn "Saurstofuna" o.s.frv. Ég horfði á þáttinn og það er ofar mínum skilningi að hægt sé að hneykslast svona mikið á honum. Meint siðleysið sá ég ekki, þvert á móti var þetta mjög eðlilegt grín að farsakenndu rugli í borgarstjórn Reykjavíkur, þótt litlu hafi verið við að bæta.

Þátturinn var talsvert yfir meðallagi, Spaugstofan er oft hundleiðinleg en hún var bara nokkuð fin í þetta skiptið. En margir virðast finna sig knúna til að setja upp vandlætingarsvip og kunna sennilega betur einhverskonar ofurkurteislegt (og leiðinlegt?) grín að þessu gegndarlausa kjaftæði í borgarmálum. Mótmæli í ráðhúsinu voru líka illa séð, sennilega hjá sama fólki. Jú, þetta eru forkastanleg vinnubrögð en það má ekki mótmæla, bara tauta yfir þessu heima í stofu og það má ekki gera grín nema mjög saklaust.

Vilhjálmur Þ. Vilhjálmsson er búinn að sitja sem borgarstjóri og hann skeit upp á bak eins og flestir vita í kringum svokallað REI-mál. Hann sá ekki sóma sinn í að segja af sér þótt hann hefði verið meiri maður á eftir heldur ætlar hann að verða borgarstjóri aftur. Enginn í borgarstjórnarflokki Sjálfstæðisflokksins virðist hafa andmælt nýjum meirihluta og sama fólk og reyndi að bola Vilhjálmi út vill nú leyfa honum að setjast í stólinn aftur til þess að fá annað tækifæri eða nánar tiltekið fá völdin aftur. Ólafur F. hefur margtönnlast á fylgistölum sínum og sagt að hann njóti stuðnings 10% Reykvíkinga og komi nú flestum sínum málum í gegn. Er eðlilegt að hann komi flestum málum sínum í gegn með slíkar fylgistölur? Er eðlilegt að Sjálfstæðisflokkurinn sem fékk flest atkvæði í borgarstjórnarkosningum lúffi með sín mál fyrir manninum sem fékk 10%, bara fyrir völd?

Nei, þetta er allt saman fullkomlega óeðlilegt og Spaugstofuþátturinn á laugardaginn var eins og blásaklaust lítið barn við hliðina á skrípaleiknum í borgarstjórn Reykjavíkur.

Yfir getu

2008-01-25T16:04:00.000Z

Um daginn sagði einhver, minnir að það hafi verið einn íþróttafréttamanna Sjónvarpsins ,að handboltalandsliðið hefði spilað yfir getu á móti Frökkum á HM í fyrra þegar þeir jörðuðu þá. Ég hef heyrt fleiri nota þetta orðalag áður.

Hvernig er hægt að spila eða standa sig yfir getu? Það sem menn gera er væntanlega það sem þeir geta.

Hvernig hljómar þetta...

Bílasalinn: "Hér er ég með eldgamla handónýta bíldruslu, en stundum skilar vélin afköstum yfir getu og þá er þetta þvílíkur eðalvagn!"
Námsmaðurinn fer ólesinn í próf, kann ekkert en stendur sig síðan yfir getu og fær 10.

...?

Borgarstjórnarleikhúsið

2008-01-22T13:44:00.000Z

Í ljósi nýjasta útspils í borgarstjórn Reykjavíkur er ljóst hvaða aðferð er rökkréttast að nota við næstu borgarstjórnarkosningar. Kjósandi mætir á kjörstað, þar er bundið fyrir augun á honum og kjörkassinn dreginn fram. Í kjörkassanum eru miðar með ólíkum möguleikum stjórnarsamstarfs. Kjósandi dregur síðan úr kassanum. Eftir þetta er kjósandi leiddur að "lukkuhjólinu" svokallaða, en þar gefur að líta alla mögulega og jafnvel ómögulega borgarstjóra. Kjósandi snýr hjólinu og getur ekki beðið eftir niðurstöðunni...

"Til hamingju! Þú hefur hlotið Vilhjálm sem borgarstjóra! Gangi þér vel, takk fyrir þátttökuna og sjáumst fljótt aftur!"

Sóðalegir spítalar

2008-01-19T11:47:00.000Z

Sá á teljari.is að einhver hafði gúglað sóðalegir spítalar án gæsalappa og komið inn á þessa síðu. Kannski vegna þess að skoðun viðkomandi er að spítalar séu sóðalegir. Kannski var hann að rífast við vin sinn um hvort þeir væru sóðalegir eða ekki og staðfesti mál sitt með því að Google gæfi 10 niðurstöður.

Einn kennarinn í skólanum notar frasann "gúgglið þetta bara!" frekar oft, sérstaklega ef hann heldur að nemendur efist eitthvað um það sem hann segir.

Framsóknarárin

2008-01-17T05:09:00.000Z

Ég glaðvaknaði núna rétt fyrir fimm í morgun og líður eins og ég sé fáránlega vel útsofinn. Mjög einkennilegt, því síðustu tvo daga hef ég sofið yfir mig og misst af fyrstu tímum í tveimur áföngum í skólanum. Hef stillt mig inn á að vakna svona um ellefu í jólafríinu og það reynist nokkuð erfitt að laga svefntímann aftur að skólanum. Jólafríið hefur líka verið svo langt að maður er búin að festa svefnvenjurnar kirfilega inn í kerfið.

Er að lesa blöðin og ég tók eftir tilvitnun í heimasíðu Valgerðar Sverrisdóttur í 24 stundum:

Stöðugleiki framsóknaráranna er horfinn og af lygnum sjá hefur þjóðarskútan nú siglt inn í ólgusjó og veðurspáin er vond. Ólgan sem ríkir meðal landsmanna stafar fyrst og fremst af pólitískum stöðuveitingum sem fóru fram í desembermyrkrinu á meðan jólahlé alþingismanna stóð yfir og annir almennings vegna jólaundirbúnings voru miklar. Sjálfsagt hefur tíminn verið valinn með tilliti til þessa. Sjálfstæðisflokkurinn hefur oft leikið þennan skollaleik með dómskerfið...

Mjög dramtísk lýsing - "stöðugleiki framsóknaráranna", "ólgusjó", "ólgan sem ríkir" "skollaleik". Mér finnst eins og hún sé að lýsa veruleika sem ég kannast ekki við, eins og hún sé í stjórnarandstöðu í Simbabve, ekki á íslandi. Þá gæti hún talað um stöðugleika framsóknaráranna, þarna þegar allt var æðislegt í Simbabve, áður en hin illa þokkaða stjórn Mugabe tók við völdum. Reyndar er stjórnarandstaða ekki leyfð í Simbabve og Framsóknarflokkurinn hefur aldrei haft völd þar, en að öðru leyti er þetta svipað.

Framsóknarflokkurinn datt út úr ríkisstjórn síðasta vor. Átakanlegar lýsingar margra flokksmanna á því hvernig nýrri stjórn hefur tekist að glutra flestu niður sem fyrri stjórn náði fram eru frekar fyndnar.

Reyfarakaup

2008-01-06T16:35:00.000Z

Nýtt samlokugrill var keypt inn á heimilið um daginn. Reyndar var það kallað heilsugrill og á að vera til að grilla kjöt og svoleiðið jukk en hugmyndin er að nota það sem samlokugrill.

Í dag setti ég tvær samlokur í grillið, fór síðan í tölvuna og gleymdi samlokunum. Tíu mínútum seinna mundi ég eftir þeim, bjóst við þeim skaðbrenndum en neinei, þær voru fullkomnar, léttristaðar og osturinn bráðnaður. Grillið er sem sagt gætt þeim eiginleikum að maður getur gleymt brauðinu í án þess að það brennist.

Þetta hljómar næstum of gott til að vera satt, gæti verið vara í Vörutorgi. Hver kannst ekki við að henda brauði í grillið og fara síðan í vinnuna, koma heim og þá er íbúðin brunnin til grunna? Nú er þetta vandamál úr sögunni með nýja NO-FIRE 3000 - grillinu!

Jólatré

2007-12-27T15:19:00.000Z

Margir Danir köstuðu jólatrjánum út í gær, annan jóladag. Maður vill heldur ekkert hugsa þá hugsun til enda hvað gæti gerst ef jólatréð er of lengi inni. Best er að vera tilbúinn á skeiðklukkunni þegar nálgast miðnætti á jóladag og þruma trénu beint út í tunnu þegar klukkan slær tólf.

Skrifstofan lokuð

2007-12-26T21:23:00.000Z

Einhverjir hafa reynt að ná í mig í síma. Ég er í Danmörku en mun væntanlega skila mér heim fyrir áramót.

Hræðilegt líf áður fyrr

2007-12-16T16:44:00.000Z

Fyrir ekki svo löngu fannst stórkostlegt skólaverkefni frá mér síðan ég var 10 ára. Kennarinn lagði fyrir það verkefni í samfélagsfræði að taka viðtal við afa eða ömmu með stöðluðum spurningum sem hann hafði samið. Verkefnið hét Hvernig var lífið hér áður fyrr? Ég tók viðtal við ömmu. Þetta tvennt stóð upp úr:

Hvernig skemmti fólk sér?
"Jólaball var haldið fyrir börnin."
Tilkomumikið.

Eftirminnilegur atburður úr æsku?
"Amma var send í sveit 6 ára og átti að vera í eitt ár en þegar föðursystir hennar ætlaði að ná í hana var afleggjarinn að bænum fullur af vatni þá þurfti amma að vera þar þangað til hún var 22 ára en hún þekkti fólkið á bænum ekki neitt."

Tekið skal fram að ég skildi ekki alveg lýsingu hennar á atburðinum svo vafasöm túlkun mín fléttast inn í svarið. Ég sé fyrir mér hvernig líf hennar hefur verið í þessi 16 ár á bænum hjá ókunnuga fólkinu. Hvern einasta dag hefur hún vaknað, farið fram og séð eitthvað ókunnugt lið (hitt heimilisfólkið) og bara eitthvað "wtf?".

Velvakandi

2007-12-10T21:51:00.001Z

Jólabækur eru auglýstar grimmt í ljósvakamiðlum. Vakið hefur athygli ný bók úr seríunni Dagbók Berts. Slíkar bækur voru vinsælar á árum áður hjá "kókópöffskynslóðinni" eins og íþróttakennarinn kallaði bekkinn minn einn daginn þá við lítinn fögnuð viðstaddra.

Kunna höfundarnir sér ekki hóf? Ætla þeir aldrei að hætta þessu? Hvar endar þetta?

Bókaauglýsing árið 2050?:

"Bert er orðinn sjötugur og sveittur á elliheimili en hefur engu gleymt. Gamli grallarinn hefur aldrei verið betri."

2007-12-10T00:44:00.000Z

Vinnukonugripin

Á fimmtudaginn lauk ég 11 vikna gítarnámskeiði hjá Ólafi Gauki, miklum meistara. Námskeiðið kallast forþrep og er fyrir algjöra nýgræðinga. Á námskeiðinu hef ég lært að spila tólf "vinnukonugrip" og glamra slatta af lögum með þeim.

Hvaðan skyldi fyrirbærið vinnukonugrip vera komið?
Á vetrarsíðkvöldum í gamla daga sat heimilisfólkið stundum inni í torfbænum og nartaði í súrt slátur og ábrysti. Þess á milli mátti heyra saumnál detta og fólkið mændi tómum augum út í náttmyrkrið. Einmitt þá rauf vinnukonan á bænum þögnina með orðinu "JÆJA!", reif upp gítarinn og spilaði Fyrr var oft í koti kátt og fleiri slagara með vinnukonugripunum til þess að rífa upp stemminguna.

2007-11-18T11:28:00.000Z

Barnapían Boris

Little Britain eru mjög misjafnir þættir. Það sama er notað aftur og aftur og aftur, sbr. manninn í hjólastólnum og gæslumann hans. Sá þátt í gær með nýrri persónu, barnapíunni Boris. Það gæti verið besta atriðið úr þáttunum frá upphafi. Fann það síðan á Youtube:

2007-11-14T17:09:00.000Z

Lús í spilum

Þegar ég var yngri spilaði ég oft við ömmu. Ég var oft látinn stokka eins og gengur og gerist en stokkaði iðulega of mikið að hennar mati. Þá fleygði hún oftast fram frasanum:

"Stokkaðu nú ekki lús í spilin, drengur!"

Í gamla daga hefur sjálfsagt oft komið fyrir að spilastokkarnir væru lúsugir eftir að einhver hafði stokkað þá of lengi. Ekki ósvipað og þegar líf kviknar í mjölinu og svona. En þetta er góður frasi og mætti yfirfæra hann á fleiri hluti, til dæmis:

Við uppvask þegar vaskari virðist ætla að vaska pottinn of vel upp: "Vaskaðu nú ekki lús í pottinn!"
Við grillið þegar grillarinn virðist í þann mund að brenna borgarana: "Grillaðu nú ekki lús í borgarana!"
o.s.frv.

2007-11-14T05:31:00.000Z

Brasilískt vax

Á forsíðu Fréttablaðsins í dag er frétt með fyrirsögninni Karlmenn verða háðir brasilísku vaxi og þar stendur að það njóti sívaxandi vinsælda. Reyndar ber þessi frétt sterkan keim af auglýsingamennsku því einhver kona á nafngreindri snyrtistofu lýsir þessu yfir og haft er eftir henni í fréttinni ýmislegt um ágæti vaxins.

Að því gefnu að þetta sé rétt, eftirspurn hafi snaraukist, er þetta enn eitt dæmið um ruglið sem virðist fylgja velmeguninni. Kannski voru það mistök að fá sjálfstæði frá Dönum um árið. Kannski er bara best að búa við skort og einbeita sér að því að hafa til hnífs og skeiðar, í staðinn fyrir að vaða upp fyrir haus í ruglinu sem fylgir miklu magni peninga í umferð, reynandi að kaupa lífsfyllingu með ýmsum leiðum. Þá eru menn a.m.k. ekki hlaupandi í brasilískt vax á milli þess sem þeir tryllast yfir opnun stærstu leikfangaverslunar landsins og kaupa nýan sportbíl á nýu bílaláni. Í staðinn kroppa þeir maðkana úr mjölinu og naga hálfsársgamla skreiðina, klæddir mölétnum klæðunum í hnipri í dimmu skúmaskoti inni í torfbænum með smá ljóstýru frá lýsislampanum og láta hugann reika um brasilíkst vax og stórar leikfangaverslanir.

2007-11-13T14:52:00.000Z

Framandi matargerð eða ólögleg loðnubræðsla

Leigjendur af erlendu bergi brotnir hafa hreiðrað um sig í kjallaraíbúð hússins fyrir fáeinum mánuðum. Undanfarnar vikur hefur gosið upp heiftarleg matargerðarlykt úr þeirri íbúð vikulega eða oftar. Lyktin er gríðarlega framandi, með kæstu ívafi og gjarnan keim af fúlum fiski.

Annar möguleiki sem mér hefur dottið í hug er að fólkið sé með ólöglegan rekstur, kannski loðnubræðslu eða aðra lyktsterka framleiðslu þarna niðri. En svo er spurningin hvað á að gera í svona málum. Kalla til heilbrigðiseftirlitið? Láta yfirvöld einangra kjallaraíbúðina? Eða bara banka upp á og lýsa frati á framandi matargerðina?

2007-11-08T11:09:00.000Z

Rannsókn: Varasamt að neyta málningar

Vísindamenn í Bretlandi hafa komist að þeirri niðurstöðu að varasamt sé að neyta málningar út á morgunkorn. Rannsóknin var gerð þannig að tveir 50 manna hópar með jöfnu hlutfalli kynja milli 20-30 ára voru skoðaðir. Annar hópurinn setti mjólk út á morgunkorn sitt í einn mánuð en hinn setti gula málningu. Ekki var unnt að greina verulegar breytingar á heilsu fyrri hópsins en þeir sem notuðu málninguna virtust verða varir við ýmsar aukaverkanir, t.d. höfuðverk, slappleika og dauða.

Niðurstaðan þótti mjög áhugaverð og tilefni til frekari rannsókna í þessum efnum.

Að gera rannsóknir á augljósum hlutum virðist vera það nýjasta, sbr. mbl.is:
"Rannsókn: Orkudrykkir hækka blóðþrýstinginn"

2007-10-27T23:55:00.000Z

Kofi 1, 2, 3

Kofi Annan
Kofi Nelson Freeman?

Morgan Freeman
Kofi Fyrsta?

Nelson Mandela
Kofi Þriðja?

Vínmenning?

2007-10-20T05:26:00.001Z

Ein helsta röksemd talsmanna afnáms einkaleyfis ríkisins á verslun með áfengi er sú að vínmenning sé svo slæm hér á landi og vísa þá sérstaklega í "ástandið í miðbænum um helgar". Þeir nefna þjóðir sunnar í álfunni þar sem verslun með áfengi er frjáls (s.s. Spán og Frakkland) og fara fögrum orðum um vínmenninguna þar. Sigurði Kára Kristjánssyni o.fl. talsmönnum nýs frumvarps virðist sérstaklega hugleikið að "geta kippt rauðvínsflösku til að hafa með steikinni heim úr búðinni".

Flutningsmenn nýs frumvarps segja að misnotkun sumra á áfengi eigi ekki að fá að hindra aðra í að kaupa það úti í búð. Þeir telja að áfengisverði verði ekki náð niður nema með þessum aðgerðum. Pétur Blöndal sagði að nauðsynlegt væri að "svipta áfengi þessum heilagleika sem það virtist hafa umfram aðrar vörur" á Alþingi um daginn.

Mér finnst mjög merkilegt að sú aðgerð að færa áfengi úr ÁTVR í matvöruverslanir eigi að bæta vínmenninguna á Íslandi eða "ástandið í miðbænum um helgar". Ég hef sjaldan heyrt hæpnari rök. Ég reyni að hugsa mér lögin ganga í gildi og vínmenninguna batna hratt í kjölfarið - hér verður fólk alemnnt brosandi út að eyrum með Bónusvín sem fékkst á frábæru verði í hönd, sitjandi úti í kvöldroðanum eftir ljúffenga steikina, hlustandi á gítarleik. Stór skærbleikur Bónusgrísinn á flöskunni brosir kumpánlega til fólksins og það dreypir aftur á vínglasinu. Í miðbænum sést ekki lengur óhófleg drykkja, heldur mun siðmenntað fólk, léttmarinerað í rauðvíni og bjór, marsera á milli skemmtistaða.

Áfengi er sveipað "þessum heilagleika" sem Pétur Blöndal nefndi vegna þess að það er ólíkt öðrum vörum. Fólk verður ekki drukkið af kornflexi og gulrótum. Af hverju vísa flutningsmenn sérstaklega til vínmenningar S-Evrópu? Af hverju taka þeir ekki frekar dæmi frá nágrannaþjóðum, sem eru líkari Íslendingum? Ég sá ástandið í miðbæ Kaupmannahafnar í ágúst, örstutt frá Strikinu voru hópar af 14 -16 ára unglingum sem sátu í hópum á götunni með bjór, væntanlega úr matvörubúðum. Þeir eldri voru margir gjörsamlega á eyrunum (svipað og í miðbæ Rvk. eða verra) og sóðaskapurinn var miklu verri en ég hef séð í miðbæ Reykjavíkur um helgar. Í Danmörku er áfengi selt í matvörubúðum. Þetta bendir mjög sterklega til þess að "ástandið í miðbænum" í Reykjavík tengist á engan hátt því hvort áfengi fáist í matvöruverslunum eða ekki. Auðvelt er líka að draga þá ályktun að einmitt vegna þess að það fæst í venjulegum búðum (þar sem erfitt er að halda úti ströngu eftirliti) í Danmörku, hafi verið svona mikið af krökkum að drekka fyrir allra augum.

2007-10-17T22:25:00.000Z

Fíflagangur

Fáir hafa sjálfsagt tekið eftir að búið er að tilkynna úrslit í nafnasamkeppninni um Háskólatorg I og II auk tengibyggingar, á lóð Háskóla Íslands. Í frétt um málið á heimasíðu skólans segir að Háskólatorg I hlýtur nafnið Háskólatorg, en 15 manns stungu upp á því nafni. Einn heppinn var dreginn úr hópnum og fær 100.000 kr. í verðlaun.

Nú hlýtur sú spurning að vakna, til hvers var samkeppni um nafn á Háskólatorg I, ef nafnið Háskólatorg er síðan valið?

Hvar liggur snilldin? Var dómnefndin gjörsamlega bergnumin yfir snilli þessara 15 manns sem fengu þá flugu í höfuðið að senda inn vinnuheitið, en sleppa númerinu aftan við?

2007-10-13T09:51:00.000Z

Gillette

Í helstu lágvöruverðsverslunum landsins, Krónunni og Bónus, eru seld rakvélablöð og aðrar rakstursvörur frá Gillette. Engar vörur í þessum flokki eru frá öðrum en Gillette. Fyrirtækið virðist hafa mjög sterka markaðsráðandi stöðu og í krafti hennar okra svínslega á vörum sínum, kannski er álagning íslensku búðanna á þeim líka allt of há. Í þessari frétt segir frá mönnum sem stálu þessari "munaðarvöru" úr verslunum á höfuðborgarsvæðinu að andvirði 900.000 kr. Ég get ekki verið hissa á að menn velji einmitt þessa vöru til að stela, ef tekið er tillit til verðsins. Hvort þeir ætluðu síðan að selja á lægra verði eða hvað hef ég ekki hugmynd um.

Síðast þegar ég gáði kostar pakki með fjórum venjulegum rakvélablöðum frá Gilette, um þúsund kall, bæði í Bónus og Krónunni. Einhver er að græða of feitt á þessu, sennilega Gillette. Fyrir nokkrum mánuðum var neyslustýringin farin algjörlega úr böndunum, því hvorki Krónubúðin né Bónusbúðin sem ég fór í átti venjuleg rakvélablöð né sköfur (tók eftir því þótt ég ætlaði bara að kaupa blöðin), eina sem þær áttu voru blöð fyrir rafdrifnar sköfur og slíkar sköfur. Ég keypti svona rafdrifna sköfu og blöð með, en það hefði ég betur látið ógert. Nú eru tveir möguleikar í stöðunni, skorturinn á venjulegum blöðum gæti hafa verið tilviljun eða þá að fyrirtækið var einfaldlega að stýra neyslu, þ.e. að fólk skyldi kaupa rafdrifnar sköfur eða ekki neitt.

Svo er annað, rafdrifnu sköfurnar eru miklu verri en hinar. Að nota rafdrifna sköfu er eins og að vera með vott af Parkinson sjúkdómnum og miklu líklegra að skera sig en ella. Þetta er jafnheimskulegt og að framleiða rafdrifin glös - þú telst heppinn ef sopinn fer rétta leið og ef brennandi kaffið skvettist ekki bara á þig og borðið og gólfið líka.

Kannski er góð hugmynd að hafa alla hluti rafdrifna. Gæti gert daglegt líf fullt af litlum en spennandi og ögrandi verkefnum - tekst raksturinn í dag án þess að skera sig?
Kem ég kaffinu úr spriklandi bollanum og ofan í maga?
Tekst mér að lesa víbrandi bókina?

2007-10-09T00:06:00.000Z

Heima

Heimildarmynd um Íslandstúr hljómsveitarinnar Sigur Rósar sumarið 2006 nefnist Heima og er sýnd í Háskólabíói. Myndin sýnir alls kyns staði innanlands og frá tónleikum Sigur Rósar og Amiinu vítt og breitt. Tónlist leikur að sjálfsögðu stóran þátt eins og sjónarspilið og inn á milli sjást viðtalsbútar við liðsmenn sveitanna. Af þeim bútum fannst mér augljóst að þetta væri stórskrýtið fólk og komst ekki hjá því að velta fyrir mér hvar í ósköpunum það hefði hitt hvert annað í upphafi - svolítið eins og álfar út úr hól. Sá einmitt fyrir mér að eitt þeirra hefði labbað út úr hól, annað hefði rekið á land á Hornströndum, það þriðja hefði poppað út úr eyðibýli í afskekktri sveit, það fjórða lent með loftsteini uppi á fjalli, það fimmta rúllað út úr MH o.s.frv... Eftir þetta hefðu þau síðan öll hist fyrir furðulega tilviljun uppi á hálendi og ákveðið að stofna hljómsveitirnar tvær.

Í þessari mynd smellpassar tónlistin við myndina og það er eiginlega eins og landslagsmyndirnar séu einmitt það sem vantar upp á tónlistina og öfugt, þ.e. að þetta bakki hvort annað upp. Til þess að sannreyna þetta ímyndaði ég mér Korn, Limp Bizkit og Pink þenja raddböndin og hamra slagverkið í takt við íslensku náttúrumyndyrnar. Það gekk engan veginn upp og mér varð eiginlega flökurt þegar þessar blöndur komu upp í hugann.

Loks ber að geta þess að myndin hafði fáránlega róandi og afslappandi áhrif, sem veitti reyndar ekki af núna því síðustu tvær helgar hafa svo til eingöngu farið í heimanám auk virku daganna fyrir utan að það var próf sl. laugardagsmorgun. Þetta er líklega hin fullkomna mynd til þess að sjá eftir slíka törn. Myndin fær því bestu meðmæli.

Einkunn: 10/10.

2007-10-02T13:42:00.000Z

Metnaður

Eigandi Steua Búkarest hefur ólgandi metnað fyrir félag sitt. Tapi liðið fyrir Arsenal í kvöld, verður þjálfarinn einfaldlega rekinn (heimild). Annað hvort er eigandinn flippaður grínari, eða snarsjóðandi sturlaður.

Ef allir eigendur liða í ensku úrvalsdeildinni beittu sömu hótun á knattspyrnustjóra liða sinna, væru sex þeirra búnir að missa starfið á þeim átta umferðum sem búnar eru. Ef hótunin virkar til þess að Steua vinnur, er augljóst að fleiri eigendur ættu að leika sama leik, því þá er akkilesarhæll Arsenal fundinn.

2007-09-28T13:53:00.000Z

Búrma/Myanmar

Fjölmiðlar hafa undanfarið fjallað mikið um vargöld í Búrma vegna herstjórnar sem stjórnar með harðri hendi þar, í Myanmar.

En þetta er einmitt sami staðurinn, Búrma og Myanmar. Sjálfsagt hefur það valdið ruglingi meðal almennings, sem hlýtur að spyrja sig hvort óánægja með herstjórn sé í Búrma eða Myanmar eða bæði á sama tíma, tveir fyrir einn. Það sem veldur enn meiri ruglingi er þegar fréttamenn virðast ekki einu sinni sammála um hvernig eigi að bera fram Myanmar, þannig bera sumir fram [míanmar], aðrir [mjanmar] og enn öðrum er þetta allt saman gjörsamlega ofviða og reyna þá að klastra þessu tvennu einhvern veginn saman, sem hljómar þá kannski [míamjanmar].

Skyldu ritstjórar fjölmiðla leggja starfsmönnum línurnar á innanhússfundum -> "Skýr ritstjórnarstefna okkar fjölmiðils er að tala um MJANMAR, en ekki eitthvað bölvað búrma eða míanmar. Misbrestur hefur orðið á þessu hjá vissum fréttamönnum, taki það til sín sem eiga."

Mér finnst Búrma flottasta heitið, sé það notað þarf enginn að velkjast í vafa um framburðinn nema einhver sérvitringurinn kjósi að túlka nefnið sem Brúmma.

2007-09-26T14:16:00.000Z

Tvennt

Fékk bréf frá lífeyrissjóði. Þar stóð að ég hefði unnið mér inn rúmar þúsund krónur á mánuði í ellilífeyri frá sjóðnum við 67 ára aldur. Hvað á ég að gera með þær upplýsingar? Hlakka til? Fara strax að bíða eftir krónunum þúsund fullur eftirvæntingar? Verður þessi lífeyrissjóður yfirhöfuð til þegar ég verð 67 ára? Alltaf eru þessi bréf frá lífeyrissjóðum eins, þau segja frá lágri mánaðarlegri upphæð sem maður fær eftir nokkra áratugi. Með fylgir svokallað fréttabréf sem sýnir nokkur súlurit og hvernig viðkomandi lífeyrissjóður hefur skilað bestu ávöxtun allra lífeyrissjóða síðustu 10 ár, og þetta virðist gilda um alla lífeyrissjóði. Allir hafa þeir skilað bestu ávöxtun undanfarin ár með einhverri reiknireglu sem þeir búa sjálfir til.
Mæli með Borgarhjólum á Hverfisgötu. Fór með hjólið í viðgerð þangað eftir að hafa nánast lent í sjálfheldu á því um daginn þegar ég var á fullu spani niður brekku og skyndilega virkuðu bremsurnar mjög illa. En þeir löguðu bremsurnar sem virka núna frábærlega og töluvert betur en þær gerðu þegar hjólið var nýtt og settu bretti á það í leiðinni eins og ég óskaði eftir. Þetta kostaði fimm þúsund kall, sem er bara aðeins meira en að kostar að fylla bensíntank einu sinni. Svo verð ég ekki nema fimm mánuði að safna fyrir þessari viðgerð þegar ég verð 67 ára með peningunum frá lífeyrissjóðnum góða.

2007-09-23T14:04:00.000Z

Hló þá imam

Ekki imaminn í Hvidovre, en imam þó.

Athyglisverðasti atburður Danmerkurferðarinnar í lok ágúst var líklega heimsóknin í moskuna í Hvidovre. Einn daginn römbuðum við fram á skilti sem vísaði á moskuna. Við biðum ekki boðanna heldur örkuðum sem leið lá þangað. Þegar komið var að moskunni var ekki um að villast, enda moskuleg með eindæmum. Í moskugarðinum stóð einkennisklæddur maður sem virtist vera vörður. Hann var frekar skuggalegur og horfði á okkur illu auga þegar við nálguðumst. Ekki var hægt að útiloka að hann væri vopnaður. Við ákváðum þó að tala við hann og þá bauð hann okkur velkomna og vísaði okkur inn. Svo fræddi hann okkur smávegis um moskuna og starfsemi og slíkt.

Við hittum merkilega vel á því vikulega bænaathöfnin (messan) var í þann mund að hefjast, eða klukkan hálftvö á föstudegi. Múslimar tóku nú að streyma inn og okkur var leyft að fylgjast með athöfninni, sátum í stólum aftast í hvelfingunni. Imam mætti í pontu og messaði yfir mannskapnum, til skiptis á dönsku og arabísku. Múslimarnir hlýddu á og báðu til Allah inn á milli með tilheyrandi beygjum og teygjum. Söngur á arabísku kom einnig við sögu, bæði hjá imam sjálfum og aðstoðarmanni.

Eftir athöfnina bauð aðstoðarmaður imamsins okkur í te og kökur inni á skrifstofu moskunnar, sem við þáðum. Þar talaði hann um slík trúarbrögð og tók skýrt fram að þeir tilheyrðu afar friðsamri grein islam (værum við í einhverjum vafa um það), þ.e. Ahmadiyya, en hvorki súnní eða sjía, en það mun vera þriðja stærsta grein Islam á eftir hinum tveimur en þó margfalt fámennari. Hann talaði um hvers vegna hann iðkaði þessi trúarbrögð og þar fram eftir götunum. Svo sagði hann að enginn í söfnuðinum kynni arabísku nema imaminn. Það þótti okkur nokkuð skemmtilegt í ljósi þess að hálf messan var á arabísku. Imaminn sjálfur mætti svona við og við inn á skrifstofuna og talaði aðeins við okkur líka.

Imaminn var frekar fyndinn því hann var skælbrosandi allan tímann.Tómas nefndi að kirkjurnar á Íslandi væru nánast tómar árið um kring nema á jólum og páskum. Hló þá imam. Tilhugsunin um tóm trúarhús hefur sjálfsagt verið skondin, enda moskan í Hvidovre troðfull alla föstudaga. Mér tókst að hella tei niður á mig því það var svo brennandi heitt og ég óviðbúinn. Imam var ekki á staðnum þá en hefði hann séð það hefði hann eflaust hlegið dátt.

Þegar við áttuðum okkur á því að aðstoðarmaður imamsins gæti líklega talað við okkur í nokkra daga samfleytt ákváðum við að drífa okkur, enda ekki ætlunin að eyða svo miklum tíma í moskunni þótt aðstoðarmaðurinn væri skemmtilegur, það vantaði ekki. Hann vildi sjálfsagt veiða okkur yfir í múslimatrúna. Að endingu gaf hann okkur bókina Islams svar på vor tids spørgsmål og sagði að í henni væri bæði komið inn á læknisfræði og stjórnmálafræði (hann hafði áður spurt okkur að því hvað við værum að læra), svo við hlytum að hafa gagn og gaman að. Ég reikna með að birta umfjöllun og ritdóm um bókina hér þegar ég verð búinn með hana. Við kvöddum að lokum og þökkuðum fyrir okkur, margs vísari og mettir af kökum og brennandi tei.