Íslendingar dottnir út á HM með sorglegu tapi fyrir Spánverjum. Þetta var eiginlega algjör óheppni. Það er ekki spurning. Svo þegar örfáar mínútur voru eftir fór boltinn upp í stúku og Íslendingar áttu innkast. Þá voru verulega illkvittnir áhorfendur á bandi Spánverja uppi í stúku sem ætluðu þá bara ekkert að láta Óla hafa boltann til þess að hann gæti tekið innkastið. Svo voru þau bara að hlæja að honum og hinum Íslendingum. Þetta var þessu fólki alls ekki til sóma. En Íslendingar fengu tvö eða þrjú tækifæri til að komast yfir sem þeir klúðruðu. En þeir voru eins og alltaf sorglega nálægt þessu. Dagur náði sér alls ekki á strik í dag og Patrekur hefur oft leikið betur. En ef litið er á björtu hliðarnar má sjá eitthvað gott í þessum leik. Sérstaklega það að Íslendingar skoruðu tvö mörk í röð tveimur færri og Spánverjar ekkert. En ég verð líka að viðurkenna að þessi Dutsjebajev hjá Spánverjum fór á kostum. Það var magnað að sjá beygði sig niður á hlið í næstum 90° horn og skoraði.
Geir Magnússon hefur verið nokkuð góður í lýsingum á leikjunum. Þó var einn galli á gjöf Njarðar: Geir saði alltaf þegar spænski marmaðurinn varði: "Hann nær að verja" í staðinn fyrir "hann ver" og þegar Spánverjar skoruðu var það alltaf: "Þeir ná að skora" Það var eins og það væri alltaf ótrúlegt að Spánverjar skoruðu. "Ha? Þeir ná að skora" en það var að sjálfsögðu alltaf sjálfsagt mál að Íslendingar skoruðu að mati Geirs. Það kemur alltaf ýmislegt spaugilegt út úr íþróttalýsunum þegar þeir eru að lýsa spennandi kappleikjum.

Íslendingar unnu Pólverja 33-29 og Dagur Sigurðsson fór á kostum og var markahæstur hjá íslenska liðinu með 9 mörk.

Hálfleikur í Ísland-Pólland
Jább, hálfleikur í leik íslands og Póllands í handbolta og Pólverjar þremur mörkum yfir. Það gefur enann veginn rétta mynd af leiknum og það verður að segjast alveg eins og er að dómarinn er algjört fífl. Maðurinn er augljóslega hlutdrægur. Pólverjarnir hafa slegið Íslendingana í andlitið hvað eftir annað án þess að nokkuð væri dæmt. En svo hefur dómarinn aftur á móti tekið hart á smávægilegum brotum Íslendinga. En ég er bjartsýnn á seinni hálfleik og trúi að Íslendingarnir vinni. Dagur er loksins kominn í gang og hefur sett fjögur mörk með þrumuskotum utan af gólfi. Svo þarf bara að fá tröllkarlinn Fúsa froskagleypi (Sigfús Sigurðsson) almennilega í gang og þá verður þetta pottþéttur sigur Íslendinganna.

Kristján Einarsson í Hallanum lést á sunnudaginn. Ég samhryggist fjölskyldu hans og öllum aðstandendum.

HM í handbolta er hafið. Íslendingar voru rétt í þessu að vinna Ástrali með fjörtíu marka mun. Þegar það voru u.þ.b. tíu mínútur eftir af leiknum voru íslendingar þrjátíu mörkum yfir og þá fór rafmagnið af. Það hefur sennilega bara verið einhver áhorfandi á bandi Ástrala sem var orðinn pirrraður, fór og fann rafmagnstöfluna, og tók helvítis rafmagnið af. Þetta er stærsti sigur Íslendinga í handbolta frá upphafi að mér skilst. Enda voru Ástralar með eindæmum lélegir.

Ræðulið 4.B keppti í dag við ræðulið 6.U og það var nokkuð góð keppni þar sem Halli sprengdi blöðru og kastaði Snickers-stykkjum, Steindór spýtti út úr sér vatni og fleira hressandi var á boðstólnum. 4.B vann verðskuldaðan sigur. Það er alveg gefið.

Öll dýrin í skóginum á fylleríi
Heimur versnandi fer. Það er alveg gefið. Það er mjög skemmtileg frétt í Fréttablaðinu í dag (16.jan). Hún fjallar um fugla í Svíþjóð sem hafa flogið á glugga háskólans í Karlstad undanfarna daga og drepist. Ástæðan fyrir þessari hegðun fuglanna var einföld: herfilegt fyllerí. Já, fuglar fara líka á fyllerí þótt ótrúlegt megi virðast. Það var þó ekki áfengi sem fuglarnir komust í heldur gerjuð ber (sem eru reyndar bullandi áfeng). Þetta hafa fuglarnir ákveðið í sameiningu. Já, nú skyldi sko sletta ærlega úr klaufunum og fara á ókeypis fyllerí (hljómar eins og íslenskt fólk). En það fór úr böndunum hjá þeim eins og gerist stundum og endaði illa. Hinir fuglarnir sem létu ekki plata sig í svona vitleysu nýta þetta í forvarnir handa ungunum sínum: "Þarna sjáiði hvernig fer þegar áfengi er haft um hönd, og það í óhófi". Svo eru örugglega nokkrir fuglar sem eru fúlir yfir því að hafa ekki komist í veigarnar. Mér þykir leitt að tilynna þeim fuglum að berin eru búin. Annars er eitt sem ég var að velta fyrir mér. Ef menn keyra fullir eru þeir sviptir ökuleyfi. Er ekki bara best að svifta sænska fuglafyllirafta flugleyfinu?
Svo var í nýliðnum desembermánuði annað vandamál með drukkin dýr.(Hvar endar þetta?). Það voru elgirnir í Noregi sem voru staðnir að verki við að gæða sér á gerjuðum eplum. Svo hlupu þeir blindfullir út á vegi og urðu í mörgum tilfellum fyrir bíl. Það verður að fara að opna sérdeild á Vogi fyrir áfengissjúk dýr. Það er deginum ljósara.

Nú er ég búinn að prófa að leika jólasvein ásamt Henrik og Pajdak á jólaballi Lyfjafræðingafélagsins. Það var ágætt. Rifja upp barnajólalögin og svona og dansa kringum jólatré. Krakkarnir á þessu jólaballi voru á aldrinum 1-5 ára. Og a.m.k. tveir krakkar voru hræddir við þessa jólasveina. Og einn krakkinn fór að grenja strax þegar við komum og grenjaði svo í dágóða stund. En flestir krakkarnir þarna virtust hafa gaman að þessu. Svo komum við að sjálfsögðu með góðgæti í poka handa krökkunum. Við fengum engin laun fyrir þetta í peningum en það var gríðarlegur afgangur af góðgætinu (nammipokum einhvurskonar) og við jólasveinarnir fengum að hirða það. Svo fengum við líka að hirða nokkrar óáteknar gosflöskur og smákökur í tonnatali. En ég veit ekki hvort ég á að leggja jólasveinsstarfið fyrir mig. Held ekki. Já, þess skal að sjálfsögðu getið hvaða jólasvein hver okkar lék. Ég var Gluggagægir, Pajdak var Gáttaþefur og Henrik Kertasníkir.

Stöð eitt er eitthvað nýtt fyrirbæri sem er "alveg að fara í loftið". Já, þetta er allt að gerast hjá þeim. Fyrst auglýstu þeir að stöðin mundi hefja útsendingar í október. Það tókst greinilega ekki alveg en síðan þá hefur hún verið alveg bara rétt að fara í loftið mjög lengi. Síðasta útspilið hjá þessari mögnuðu stöð var að segja "dagskrá í desember" Já, þetta er allt að skella á góðir hálsar. NÚ byrja þeir. En nei, ég stillti á þessa stöð áðan og nú eru þeir hættir að auglýsa dagskrá í desember. Æ, þetta tefst víst aðeins. Fólk fyrirgefur það nú býst ég við. Nei, þetta hefur tafist aðeins núna síðan í október. Tæknin er sennilega eitthvað að stríða þeim. Eru þetta algjörir fávitar? Svo eru þeir bara að selja auglýsingar og læti. Ha, Daníel Edelstein sjóntækjafræðingur og eithhvað fasteignarugl. En þeir virðast vera hættir að auglýsa hjá þeim núna. Skrýtið. Svo fer þetta sjálfsagt bara á hausinn hjá þeim.

Omega er rosalega skemmtileg stöð. Sérstaklega þegar hann Guðlaugur Laufdal tekur upp gítarinn og fer að syngja. Það er himneskt. NEI. Svo er allltaf gaman að sjá þegar áhorfendur hafa sent inn bréf þar sem þeir vilja láta biðja fyrir einhverju eða þakka fyrir eitthvað. "Já, góði Guð þakka þér fyrir Omega" sögðu þau um daginn. Já, þetta vita nú ekki allir en hann Guð blessaður, hann stofnaði einmitt Omega á sínum sokkabandsárum. Stundum eru þessir predikarar bara að bregða sér í Guðslíki. Og sumt sem þeir segja þarna á stöðinni getur varla flokkast undir annað en guðlast. Það er líka gaman að sjá þennan Benny Hinn. Fólk kemur upp á svið til hans og hann læknar það af hinum ótrúlegustu kvillum. "Hún Jenna hefur verið í hjólastól í tíu ár, en nú ætlar Benny að lækna hana" og svo snertir Benny Hinn ennið á henni og hún líður út af. PAFF! Hún er læknuð og þarf aldrei framar að vera í hjólastól. Ég veit ekki með aðra en ég trúi alls ekki á kraftaverk Benny Hinn.
Ég vil samt sjá meira á Omega, eins og beinar útsendingar frá himnaríki og á gamlársdag þegar hinar stöðvarnar sýna ávarp forsætisráðherra gæti Omega bryddað upp á nýjung og sýnt ávarp Guðs þar sem Guð fengi einstakt tækifæri til að ávarpa þegna sína.

Fyrst var það Benny Hill en nú er það Benny hinn. Hvar endar þetta?

Nú er ég því miður búinn að kveðja steinþursana sem voru hérna í bakgrunni en það var út af rugli á síðunni. (tæknin eitthvað að stríða mér).
Ég óska öllum gleðilegra jóla.

Ég fékk fjórar jólagjafir. Þær voru þessar:
1. Bókin LoveStar eftir Andra Snæ Magnason
2. Peysa
3. Litla lirfan ljóta á myndbandi
4. Rúmföt (satínrúmföt, gaman að því)
Ég fékk þrefalt fleiri gjafir þegar ég var yngri. Annars fór ég í hið árlega jólakaffi hjá ömmu og afa í dag þar sem allir ættingjarnir í föðurættinni voru saman komnir. Amma er alltaf að tala um að ég sé of horaður. Áðan í kaffinu var amma að spyrja mig hvað ég vildi að drekka og ég vildi bara vatn. Það fannst ömmu nú alls ekki ganga, nei ekki vatn á jólunum! "Það eru nú jól, Guðmundur minn!" sagði hún (Þá á maður að troða í sig sætindum og óhollustu) . Ég átti nú aldeilis að fá heitt súkkulaði í bolla eða jólablöndu eða eitthvað annað gos. Já, já. Svo er amma líka oft að tala um að það væri nú best ef hann frændi minn gæti nú gefið mér nokkur kíló (frændi minn er í þéttari kantinum) mér mundi nú ekkert veita af því. Svona eru þessar ömmur.
Svo er ég byrjaður að lesa bókina LoveStar og hún byrjar bara vel. Reyndar er þetta óttaleg vitleysa en það er fínt fyrir mig.
Svo þarf ég að horfa á Lirfuna. Hún er besta íslenska tölvuteiknimyndin. Hún er reyndar ein af bestu íslensku myndum sem ég hef séð.
Jólamaturinn var ekki jafn góður og venjulega. Kalkúnsfjandi. Hann er engin önd en hann er sosum ágætur, greyið. Öllum í fjölskyldunni þótti kalkúnninn betri eða jafngóður og önd nema mér. Ég mun samt sjá til þess að það verður önd á næsta ári.

Ég las frétt í dag um að fimmtán manns hefðu verið fluttir með sjúkrabíl á slysadeild vegna brjótssviða í nótt. Orsökin var að fólkið hafði étið yfir sig af feitu og söltu kjöti. (Manni bara dettur í hug lína úr einhverju jólalagi: "Svoooona eru jóóólin, svona eru jólin....")
Ég er búinn að ákveða að vera ekkert að éta eins og svín þessi jólin. Það endar alltaf illa.

Æ,æ,æ,æ,æ. Það verða engin jól hjá mér. Pabbi kom áðan heim úr verslunarferð og tilkynnti sorgarsöguna. Önd fæst hvergi. Það var honum sagt í búðinni sem hann fór í. Það hefur verið önd í jólamatinn hjá okkur frá því að ég man eftir mér og ég efast um að ég lifi það af að fá enga önd. Maður neyðist kannski til að fara út að Tjörn og slátra einni. Nei, uss! Það er ljótt. Í staðinn verður kalkúnn í jólamatinn. Hörmungarástand. Svona er þetta á þessum síðustu og verstu tímum. Ég sem var búinn að hlakka til að fá önd síðan á síðustu jólum. Þannig að það verður grátur og gnístran tanna hér í kotinu á jólunum. Nei, það verða engin jól. Jæja ég er hættur að blogga og farinn að gráta.