Aðalmálið að vera með?

Liverpool fengu skell gegn Espanyol í æfingaleik í gær, töpuðu 3 - 0. Í viðtali eftir leikinn segir kantmaðurinn knái, Riera, leikæfinguna mikilvægari en úrslitin.

Svo er bara spurningin hvað Riera segir í lok komandi tímabils ef það verður enn eitt tímabilið án Englandsmeistaratitils - kannski "Aðalmálið er að vera með," áhangendum til ómældrar gleði.

Svona gera menn ekki.

11 eintök af Bláma

Er að hlusta á lýsingu Bjarna Fel á leik Stjörnunnar og Vals, sem Stjarnan er að mala, ekki að spyrja að því. Nema hvað, Bjarni kallar þá alltaf Stjörnustráka. Bjarni er þar að rugla þeim saman við aðalpersónu jóladagatals Sjónvarpsins um árið, Stjörnustrákur, um stjörnustrákinn Bláma.

"En boltinn berst beint til stjörnustráks..." Annars væri tilkomumikið að sjá ellefu eintök af Bláma spila fótboltaleik. Fruntalega kerlingin mundi að sjálfsögðu stýra liðinu.

Ekki lítið land

"Ísland ekki lítið land, Ísland stórasta land í heimi!" sagði forsetafrúin við RÚV eftir að forsetinn hafði talað um smæð Íslands í nokkra stund eftir sigurinn á Spánverjum.

Þetta er nú þegar orðið frasi og ætti að fara sem áletrun á boli til stuðnings liðinu.

Blaðamannafundur

Ég mæli með blaðamannafundi með Avram Grant, knattspyrnustjóra Chelsea eftir leik þeirra gegn Everton á fimmtudagskvöld. Forsaga málsins er sú að þegar örfáir leikir eru eftir í ensku úrvalsdeildinni stendur baráttan um meistaratitilinn á milli Manchester United og Chelsea. Fjöldi fjölmiðla hefur afskrifað Chelsea í baráttunni fyrir löngu og gefið sér að Manchester verði meistarar. Menn víla jafnvel ekki fyrir sér að slá upp stríðsfyrirsögnum um hversu öruggt það sé.
Ágætt er að hafa í huga að fyrir rúmum tveimur mánuðum eða svo sló fjöldi fjölmiðla því föstu að Arsenal yrðu Englandsmeistarar, ekkert gat komið í veg fyrir það. Þeir spiluðu stórbrotinn sóknarbolta sem enginn gat stoppað og allt það. Í dag er staðan önnur, Arsenal er fallið úr Meistaradeildinni og tap þeirra gegn Man. Utd. um daginn rak síðasta naglann í líkkistuna í deildinni, svo að allar titilvonirnar eru fyrir bý á þeim bæ.

Ofan á það að ýmsir ónefndir fjölmiðlar hafi hampað Man. Utd. og um leið gert lítið úr möguleikum Chelsea bætist að erfiður leikur þeirra gegn Everton, sem átti að fara fram í dag (laugardag), var færður og leikinn sl. fimmtudag nánast fyrirvaralaust, til þess að Sky sjónvarpsstöðin gæti sýnt leikinn beint. Það þýddi að Chelsea spilaði bæði á mánudag og fimmtudag í vikunni sem leið. Tilfærsla leiksins þýddi að sumir miðaeigendur misstu af leiknum o.fl. Samsæriskenningar hafa verið búnar til af minna tilefni.

Af þessu ætti að vera ljóst að Avram Grant var ekki pirraður að ástæðulausu á fréttamannafundinum eftir leikinn. Hér eru nokkrar spurningar og svör af fundinum:

Áttuð þið skilið að vinna, Avram?
A: "já"

Hvað varstu ánægðastur með í frammistöðu liðsins í kvöld?
A: "Ég er ánægður"

Hvað varstu sérstaklega ánægður með?
A: "Ég veit það ekki"

Hefurðu einhver skilaboð til stuðningsmanna Chelsea?
A: "Eruð þið fulltrúar stuðningsmanna Chelsea?"

Þeir hljóta að trúa að þið eigið enn möguleika á titlinum, hefurðu einhver skilaboð til þeirra?
A: "Engin skilaboð"

Þú virðist ekki eins málglaður og venjulega, Avram. Er það vegna þess að Sky sjónvarpsstöðin lét færa leikinn yfir á fimmtudag?
A: "Kannski er það vegna ykkar. Ég veit það ekki. Það er í lagi með mig."

Tveimur spurningum síðar...
Er þetta vegna Sky?
A: "Nei. Sky er ágæt stöð. Mér finnst gaman að horfa á hana."

Viðtalið í heild má nálgast hér.

Spennan er töluverð í fótboltanum þessa dagana, bæði í Meistaradeild og ensku deildinni. Man. Utd. á möguleika á sigri í þeim báðum. Hins vegar er líka möguleiki að þeir vinni hvorugt, sem mér þætti alls ekki leiðinlegt.

Dagar Benitez taldir hjá Liverpool

Í dag er Liverpool, sigursælasta lið Englands frá upphafi, orðið aðhlátursefni um heim allan. Knattspyrnustjórinn Rafael Benitez tekur ótrúlega handahófskenndar ákvarðanir við byrjunarliðsval hvað eftir annað og það sama má segja um innáskiptingar. Menn nenna varla að vera að standa sig vel í leikjum þegar þeir vita ekkert hvort það þýði fleiri byrjunarliðsleiki í kjölfarið. Dirk Kuyt og John Arne Riise hafa t.d. verið eins og beljur á svelli svo til allt tímabilið, en það hindrar ekki að þeir fái hvern leikinn á fætur öðrum í byrjunarliðinu og geta leyft sér að vera drulluslakir hvað eftir annað.

Benitez er að verða eins og villti Villi borgarfulltrúi. Gerir síendurtekin "klaufaleg mistök" en einn og einn reynir samt ennþá að verja þá. "Benitez vann nú Meistaradeildina með liðið 2005!" segja menn til marks um ágæti hans sem þjálfara. Vissulega mjög mikið afrek með þá leikmenn sem hann hafði þá. En málið er að það er ekki hægt að lifa endalaust á fornri frægð. Það þýðir ekkert að ætla að vinna Meistaradeild 2005 og skemma síðan liðið.

Super Bowl

Í gær var bein útsending frá úrslitum í Bandaríska fótboltanum. Til þess að vera maður með mönnum stillti ég inn rétt fyrir leik og beið iðandi eftir þessum heimsviðburði. New York Giants og New England Patriots mættust. Spekingarnir voru mættir inn í stúdíó og ræddu málin með kaffi og kleinur undir dynjandi rappmúsík. Giants voru "underdogs" að sögn spekinganna, svo ég ákvað að halda með þeim.

Leikar hófust, gríðarleg spenna, svo var allt stopp eftir nokkrar sekúndur. Auglýsingahlé voru gerð hvað eftir annað og spekingarnir gripu inn í þess á milli inni í stúdíó. Leikurinn virtist aldrei vera í gangi nema svona eina mínutu í senn, svo var stoppað. Hvers konar sjónvarpsefni er þetta?

Leikmenn virtust sumir vera feitir, sem sjaldgæft er að sjá i keppnisíþróttum. Síðan voru þeir margir málaðir í framan með stríðsmálningu, sem var nokkuð kjánalegt. Ég gafst upp á að horfa þegar annar leikfjórðungur var nýhafinn, engu nær um það fyrir hvað þessi viðburður er svona vinsæll.

Menn halda alltaf að þeir séu að finna upp hjólið

Hjólreiðar hafa aukist á götum Reykjavíkur undanfarin misseri. Hjólakappar spretta upp eins og gorkúlur og skjótast út úr næsta runna eða húsasundi á fljúgandi ferð. Bílstjórar eru margir hvumsa og kunna ekkert að bregðast við auknu framboði hjólreiðamanna. Sumir virðast líta á þá sem lægra setta og því megi svína á þeim að vild. Það er alrangt.

Hjólið sem ég fékk í stúdentsgjöf í fyrravor hefur reynst mjög vel og ég hef nýtt það óspart. Hjólaði í skólann í allan vetur ef veður var ekki þeim mun hryssingslegra eða hálka á götunum. Í sumar hef ég notað hjólið mikið enda veður gott. Um daginn hjólaði ég úr Vesturbænum og upp í Breiðholt (Fellahverfi), reiknaði fyrirfram með að það væri talsvert erfitt, en sú reyndist ekki raunin. Túrinn tók 45 mínútur á háannatíma, sem er ekki mikið meira en bíll fer þetta á í mestu traffíkinni. Einn kafli leiðarinnar tók aðeins á, að hjóla upp Elliðaárdalinn - að öðru leyti var þetta eins og að drekka vatn.

Hjólið hefur ýmsa kosti umfram bílinn, það eyðir ekki bensíni og þarf mun sjaldnar að stoppa á umferðarljósum (vegna undirganga) en eilíf stopp og tafir eru það leiðinlegasta við að keyra bíl hér í bænum. Stærsti kosturinn er þó líklega sá að það er miklu skemmtilegra að hjóla heldur en að keyra. Hins vegar mættu borgaryfirvöld sjá sóma sinn í að bæta aðgengi fyrir hjólreiðamenn, s.s. með fleiri undirgöngum o.s.frv. Það er komið yfirdrifið nóg af þessum andskotans mislægu gatnamótum og hringavitleysugöngubrúm (eins og yfir nýju Hringbraut). Bæta ætti strætókerfið og aðgengi fyrir hjólandi og gangandi. Bíllinn þarf ekki alltaf að vera númer eitt, tvö og þrjú þegar samgöngur eru skipulagðar í Reykjavík.

Lokaniðurstaða er sú að ég mæli eindregið með því að fólk hjóli eins mikið og hægt er, sérstaklega eins og veðrið hefur verið í sumar. Ekki hjóla bara einu sinni í vinnuna með sparibrosið í botni af því að það er "Vika hjólsins" og birtast á myndum í blöðunum eins og ónefndir stjórnmálamenn.

Jabba the Hut fær að slá botninn í þessa færslu.

Barcelona - Liverpool 1-2

Töluverða furðu vakti að Bellamy og Riise skyldu vera í byrjunarliði Liverpool fyrir leikinn gegn Barcelona í ljósi nýliðinna atburða (sem munu að vísu hafa verið kryddaðir nokkuð í fyrstu útgáfu fréttarinnar). Herbragðið reyndist hins vegar hárrétt hjá Benitez og Craig "kylfa" Bellamy jafnaði metin, 1-1, og áður en yfir lauk tryggði John "fórnarlamb/klöguskjóða" Riise verðskuldaðan sigurinn.

Þetta var einstaklega gott á lið Barcelona enda voru margir þeirra sífellt að reyna að fiska og því miður oft með góðum árangri. Heimadómgæsla dugði hins vegar ekki til og Barcelona-menn uppskáru eins og þeir sáðu á Nou Camp.

Þjóðarsorg

Varð hissa þegar ég mætti í skólann í morgun, fjórfaldi hagfræðitíminn sem ég átti að mæta í féll niður. Enginn skóli þá hjá mér í dag. Það fyrsta sem mér datt í hug var að búið væri að lýsa yfir þjóðarsorg í landinu út af tapinu í gær, öll fyrirtæki og stofnanir lokuð og flaggað í hálfa. En sú var ekki raunin.

Annars var það óþolandi kjaftshögg þegar Danir skoruðu sigurmarkið í framlengingunni í gær, 2-3 sekúndum eftir að Alexander skaut í stöng danska marksins. Það munaði minna en hársbreidd að Íslenska landsliðið færi í undanúrslit, sem hefði opnað fleiri möguleika (deginum ljósara að liðið hefði verið fullfært um að vinna Pólverja í undanúrslitum, enda einungis ein klaufamistök sem kostuðu sigurinn/jafnteflið gegn þeim í milliriðlinum). Í lok venjulegs leiktíma þegar Snorri Steinn jafnaði með glæsilegu víti undir yfirgnæfandi pressu fannst manni einhvern veginn að Íslendingar ættu skilið að vinna.

Hugsanlegur leikur um fimmta sæti á mótinu skiptir engu máli. Mér finnst ekki taka því að spila um það. Eftir stendur að liðið hefur sennilega aldrei spilað betur á stórmóti (náðu víst 5.sæti 1997 en ég man voða lítið eftir því) og komust í átta liða úrslit þar sem þeir duttu út, en það verður seint kallað verðskuldað. Áttu fínasta séns til að fara alla leið í úrslit á mótinu en því miður snerist lukkan gegn þeim. Og hver veit hvenær svona tækifæri kemur aftur? Það síðasta sem ég mundi vilja heyra frá fólki, væri ég í þeirra sporum væri: "Það gengur bara betur næst" en þeir munu örugglega heyra það úr ýmsum áttum, eflaust við lítinn fögnuð.

Vanmat á báða bóga?

Nú heyrist í íslenskum fjölmiðlum og jafnvel einnig sums staðar á götum úti að Íslendingar hafi verið heppnir með andstæðinga í átta liða úrslitum, Dani. Danskir fjölmiðlar lýsa því hins vegar yfir að það séu Danir sem hafi verið heppnir með andstæðinga. Báðar fullyrðingarnar gætu svosum verið réttar, hallast samt frekar að því að báðar séu rangar.

Gallinn er sá að Íslendingar vita ekkert um spilamennsku Dana á mótinu annað en úrslit úr leikjum þeirra (gætu reyndar einnig hafa lesið umfjöllun um leiki Dana e-s staðar, það er bara alls ekki það sama og að horfa) því engir leikir þeirra hafa verið sýndir hér í Sjónvarpinu. Það sama má segja um Dani, þeir hafa ekki séð leiki Íslendinga í keppninni og hafa því ekki efni á slíkum yfirlýsingum.

Spá: Algjörlega ómögulegt að spá á hlutlausan hátt. Líklegt þó að leikurinn verði spennandi.

Í fjarveru Duranona

Íslenska handboltalandsliðið stendur sig furðuvel þrátt fyrir að Duranona sé ekki með enn sem komið er. Sennilega verður hann ekki kallaður inn í liðið fyrr en í úrslitaleiknum þegar öll sund virðast lokuð í hálfleik. Þá mun hann skyndilega birtast og jarða andstæðingana með ótrúlegum leik við gríðarlegan fögnuð múgsins, sem mun garga "Dúndranúna!" eins og kappinn er ævinlega kallaður.


Leynivopn Íslands.

Úrslit dagsins

Lengi á eftir var ekki minnst á Liverpool.

Manchester United - Liverpool

Á morgun eigast stórveldin við í ensku deildinni. Manchester United hafa byrjað deildina fáránlega vel eftir að Alx Ferguson gerðist svo djarfur í sumar að selja aðalmarkahrók liðsins, Ruud Van Nistelrooy, og ekki nóg með það, heldur fékk hann engan í staðinn fyrir hann. Það sem hefur hins vegar hjálpað M.U.-mönnum mikið nú í byrjun deildarinnar er að Ole Gunnar Solskjaer birtist allt í einu í byrjun leiktíðar eins og þruma úr heiðskíru lofti, eftir að hafa legið einhvers staðar meiddur í þúsund ár, og hefur farið á kostum, gamli melurinn. Louis Saha hefur einnig verið drjúgur í framlínunni. Liðið hefur staðið sig fáránlega vel miðað við mannskap.

Liverpool hefur hins vegar skitið upp á bak í byrjun leiktíðar í deildinni og er um miðja deild. Þó virðast menn þar smám saman vera að koma til og unnu þeir ágætan sigur á Bordeaux í Meistaradeild í vikunni. Liðið einfaldlega verður að sigra á morgun, en United mega við tapi.

Ég ætla að spá því að United fái sinn fyrsta skell á tímabilinu og tapi þessum leik 3-0. Sá spádómur er að sjálfsögðu mjög blandaður óskhyggju. Ég tippa á að annar hvor mestu hálfvita þess liðs (Wayne Rooney eða Rio Ferdinand) verði rekinn út af og það geri útslagið í skellinum mikla. Peter Crouch mun skora tvö mörk fyrir Liverpool en alls óvíst er hver smellir því þriðja.

Leikurinn verður í opinni dagskrá á SkjáEinum klukkan 12:00 á hádegi.

Ísköld vatnsgusa beint í andlitið

Meira en áratugur er síðan Liverpool-menn hafa gert meiri væntingar til liðsins en nú. Leikmannahópurinn hefur verið bætur gríðarlega í sumar og hafa menn talað um hagsýnustu kaup deildarinnar (til samanburðar hefur efsta lið deildarinnar, Man. Utd. aðeins keypt einn mann í sumar og það á rúmar 20 milljónir punda, sem er allt allt of mikið fyrir þann mann).

Í hádeginu í dag lék svo Liverpool við nágrannalið sitt og annálað kúkalið, Everton. Liðið tapaði 3-0. Þetta er kaldasta vatnsgusa sem stuðningsmenn Liverpool hafa fengið í andlitið síðan ég veit ekki hvenær.

Væntingar til liðsins fyrir tímabilið hafa nú verið niðurfærðar úr því að spá þeim titlinum og í það að hrósa happi yfir að halda sæti sínu í deildinni.

Ég vona að leikmenn liðsins skammist sín fyrir afglöp dagsins og girði upp um sig brækur fyrir næsta leik og vinni hann sannfærandi.. Annað væri óboðlegt.

Englandsmeistarar vorið 2007

Liverpool. Ekkert annað lið kemur til greina. Chelsea verða slappari en í fyrra. Manchester United byrja mjög vel, en spilaborgin mun hrynja mjög fljótlega vegna þess að nokkuð vantar upp á breiddina (hvað ætla þeir að gera ef Rooney meiðist?). Arsenal byrja tímabilið frekar illa, en þó á ég von á að þeir endi í öðru sæti.

Spá fyrir fimm efstu:

1. Liverpool
2. Arsenal
3. Manchester United
4. Chelsea
5. Tottenham.

5-1

Liverpool rótburstaði Fulham 5-1 og steingeldir framherjarnir skoruðu þrjú markanna. Fólk hefur litið á framherjana sem trúða og grínara hingað til en vonandi breytist það núna. Ég hefði nú samt alveg verið sáttur ef Peter Crouch og Fernando Morientes hefðu mætt trúðsmálaðir í næsta leik. En sennilega hefði það aldrei orðið að veruleika.

Peter Crouch-grínið II

Jæja, þetta klikkaði. Evrópumeistarar Liverpool duttu út gegn Benfica. Peter Crouch var hryllilega lélegur allan leikinn. Sá eina góða sendingu hjá honum, annað var glatað. Djimi Traoré var skelfilegur í vörninni. Cissé var ekki góður þegar hann fékk tækifærið. Meistaradeildar-Garcia gleymdist heima. En ekki er þeim einum um að kenna, það vantaði líka alla meistaraheppni. Simao Sabrosa, sem var næstum genginn til liðs við Liverpool, skoraði mikilvæga markið í fyrri hálfleik. Kaldhæðni þar á ferð.

Annars er það einstakt hve miklir blöðruselir Gaupi og Logi Ólafs eru:
Þetta sögðu þeir mörgum sinnum undir lokin: "Sögulegur leikur". Það var nákvæmlega ekkert sögulegt við þennan leik. Það var ekkert merkilegt við hann. Eða ætla Gaupi og Logi að tala um í ókominni framtíð "Þegar Benfica sló út Evrópumeistara Liverpool um árið"? Svo sagði Gaupi líka: "Peter Crouch hefur varla sést í síðari hálfleik, en hann var góður í þeim fyrri". Gaupi hefur ekki horft á sama leik og aðrir.

Nóg af þusi.

Geðdeildin II?

Nei, Meistaradeildin.

Liverpool - Benfica á morgun á Anfield. Liverpool verða að vinna og munu vinna, 3-0.

Nú er eins gott að Rútínan klikki ekki. Spennan er rafmögnuð.

Forlögin

Ég hef aldrei trúað sérstaklega mikið á forlög eða stjörnuspár eða aðra vafasama hluti í þeim dúr.

En eitt trúi ég á: RÚTÍNUNA.

Rútínan felst í því að þegar Liverpool keppir í Meistaradeildinni förum ég og Tom á Glaumbar að fylgjast með leikjunum (fáum okkur einn bjór fyrir hvorn hálfleik og oftast borgara á Nonnabita eftir leik). Alltaf og ævinlega hefur þessi Rútína skilað jafntefli eða sigri Liverpool og þeir hafa komist áfram í næstu umferð. Rútínan skilaði sigri í Meistaradeild Evrópu í fyrra, en í fyrra var einmitt líka árið sem Rútínan hófst.

Ef sigur í Meistaradeildinni í fyrra er ekki næg sönnun mætti kannski nefna að Liverpool tapaði í kvöld 1-0 fyrir Benfica en það var einmitt líka í kvöld sem Rútínunni var ekki fylgt eftir vegna þess að ég er veikur (með iðandi hálsbólgu og þrumandi hausverk og ólgandi hita annað slagið) og sá mér ekki fært að mæta. Það er alveg 100% gefið að þetta fokking Benfica-lið hefur sent hingað útsendara sinn til að smita mig og eyðileggja þar með Rútínuna góðu.

En þetta er engan veginn búið, seinni leikurinn er eftir og þá komast þessir andskotar ekki upp með bellibrögð.

e.s. Það mætti kannski nefna það að þessi orð eru rituð af veikum manni sem er með óráði.

Djarfur

Ég ætla að gerast svo djarfur að spá Liverpool sigri í Meistaradeild Evrópu, sigri í Ensku bikarkeppninni og 2.sæti í ensku úrvalsdeildinni. Vill einhver mótmæla?